საპარლამენტო ფრაქცია „ქართული ოცნება - ძლიერი საქართველოსთვის“ თავმჯდომარის, ისნის N8 ოლქის მაჟორიტარი დეპუტატის, ირაკლი აბუსერიძის, თბილისის საკრებულოს წევრის ლევან დავითაშვილის და თბილისის საბავშვო ბაგა-ბაღების მართვის სააგენტოს ინიციატივითა და მხარდაჭერით N156 საბავშვო ბაღში რაგბის მოედანი გაიხსნა.

ირაკლი აბუსერიძის განცხადებით, ეს არის უპრეცედენტო, ისტორიული პროექტი, რომელიც საქართველოს მასშტაბით პირველად განხორციელდა, მან ასევე ისაუბრა რაგბის პოპულარიზაციასა და სკოლამდელი ასაკის ბავშვებში ჯანსაღი ცხოვრების წესის დანერგვის მნიშვნელობაზე.

„ჩვენს მაჟორიტარულ ოლქში, კერძოდ N156 ბაგა-ბაღში ახალი რაგბის მოედანი გავხსენით. ჩემთვის ძალიან მნიშვნელოვანი და სასიხარულო დღეა, რადგან ჩვენი ერთობლივი ინიციატივა შესრულდა. ეს მართლაც ისტორიული, ინოვაციური და უპრეცედენტო პროექტია, რომელიც საქართველოს მასშტაბით პირველად განხორციელდა. მხარდაჭერისთვის მადლობა მინდა გადავუხადო თბილისის საბავშვო ბაგა-ბაღების მართვის სააგენტოს ხელმძღვანელს, კახა გვანცელაძეს.

საბავშვო ბაღში რაგბის მოედნის არსებობა და სასწავლო პროცესის ფიზიკური აქტივობებით დატვირთვა ხელს შეუწყობს ჯანმრთელი მომავალი თაობის აღზრდას, რაგბის პოპულარიზაციას და ბავშვებს საშუალებას მისცემს ადრეულ ასაკში დაეუფლონ სპორტის ამ სახეობას, ასევე ბავშვებისთვის რაგბის ელემენტების შესასწავლად და უნარების ჩამოსაყალიბებლად იგეგმება პედაგოგთა გადამზადება. დარწმუნებული ვარ აქ, ამ მოედანზე გაიზრდებიან წარმატებული სპორტსმენები, რომლებიც მომავალში დიდ რაგბს ითამაშებენ.

მინდა ხაზგასმით აღვნიშნო, რომ ჩემი მხრიდან ყოველთვის არის მზაობა იმისთვის, რომ მაქსიმალურად შევუწყო ხელი ყველა რეგიონს, რათა ახალგაზრდა თაობას ჰქონდეს რაგბის თამაშის თანაბარი შესაძლებლობა“, - განაცხადა ირაკლი აბუსერიძემ.

დღევანდელ ღონისძიებას ესწრებოდა თბილისის საბავშვო ბაგა-ბაღების მართვის სააგენტოს ხელმძღვანელი კახა გვანცელაძე, ქ. თბილისის საკრებულოს წევრი ლევან დავითაშვილი, ისნის რაიონის გამგებელი კახა ლაბუჩიძე და საუბნო განყოფილების ხელმძღვანელი ხვიჩა ჩალაბაშვილი.