საპარლამენტო უმცირესობის ლიდერის, დავით ბაქრაძის განცხადებით, საზოგადოებისთვის ცნობილი გახდა, რომ უზენაესი სასამართლოს იმ მოსამართლეებზე, რომლებიც „რუსთავი 2-ის“ საქმეს იხილავენ, ზეწოლა ხორციელდებოდა. 

„ჩვენ, გუშინ, ყველამ ერთად ვიზეიმეთ ევროპასთან უვიზო მიმოსვლა, მაგრამ, თუ საქართველოში არ იქნება უზრუნველყოფილი მედიის თავისუფლება და სასამართლოს თავისუფლება, გვერდზე დაგვრჩება ვიზებიც, ევროპაც და საერთოდ ნორმალური განვითარება“, - აღნიშნა საპარლამენტო უმცირესობის ლიდერმა.

ბრიფინგზე დავით ბაქრაძემ საპარლამენტო უმცირესობის მოთხოვნები წარმოადგინა და საქართველოს პრეზიდენტს საგამოძიებო პროცესებში ჩართვისკენ მოუწოდა.

„მივმართავთ პრეზიდენტს და როგორც კონსტიტუციის გარანტს ვთხოვთ, უშუალოდ ჩაერთოს ამ საქმის გამოძიებაში და უშუალოდ მიადევნოს თვალყური გამოძიების მიმდინარეობის პროცესს. საპარლამენტო ოპოზიცია აუცილებლად შევხვდებით საქართველოში აკრედიტირებულ დიპლომატიურ კორპუსს, საქმის კურსში ჩავაყენებთ მათ და ვთხოვთ, რომ ჩვენმა უცხოელმა პარტნიორებმა ბოლომდე მიადევნონ თვალი ამ საქმეს. მოვუწოდებთ არასამთავრობო სექტორსა და სამოქალაქო საზოგადოებას გვერდზე გადავდოთ ყოველგვარი შიდაპარტიული განსხვავება და ამ ფუნდამენტური თემის ირგვლივ ვითანამშრომლოთ იმისთვის, რომ საზოგადოებას ჰქონდეს ინფორმაცია და ეს საკითხი მთლიანად იქნეს გამოძიებული”, - განაცხადა დავით ბაქრაძემ. უმცირესობის ლიდერი აღნიშნული საქმის გამოძიებაში პარლამენტის ჩართვის და ახლო მომავალში შესაბამისი საპარლამენტო კომისიის შექმნის ინიციატივითაც გამოვიდა.