საპარლამენტო უმცირესობის ლიდერი დავით ბაქრაძე და საპარლამენტო უმცირესობის ლიდერის მოადგილე გიორგი ბოკერია USAID-ის დირექტორის მოადგილეს ევროპისა და ევრაზიის საკითხებში ბროკ ბირმანს შეხვდნენ, რომელიც საქართველოში ღია მმართველობის პარტნიორობის (OGP) გლობალურ სამიტში იღებს მონაწილეობას. 

როგორც გიორგი ბოკერიამ განაცხადა, შეხვედრაზე საკითხების ფართო სპექტრს შეეხნენ, ისაუბრეს თანამშრომლობის შემდგომი გაღრმავების მნიშვნელობაზე.

„ძალიან მნიშვნელოვანია ჩვენთვის USAID-ის ახალი ხელმძღვანელის ვიზიტი. წლების განმავლობაში ეს ორგანიზაცია, ისე როგორც მთლიანად შეერთებული შტატები, ამერიკელი ხალხი საქართველოს ეხმარებოდა ჩვენი ქვეყნისთვის ყველაზე საკვანძო მიმართულებებში და დიდი მნიშვნელობა ექნება ამ თანამშრომლობის გაგრძელებას იმისთვის, რომ ჩვენი ქვეყანა წინ წავიდეს. ამიტომ ძალიან მნიშვნელოვანია ეს ვიზიტი. მოხარული ვარ რომ ახალი ხელმძღვანელი და მისი გუნდი კარგად იცნობენ საქართველოს, მის პოლიტიკურ სპექტრს, ჩვენს პრობლემებს და ის ხედვა აქვთ, რომელიც საქართველოს სჭირდება“, - განაცხადა შეხვედრის შემდეგ გიორგი ბოკერიამ.