საქართველოს პარლამენტის მაჟორიტარი წევრი ანზორ ბოლქვაძე, ჯავახეთის წმინდა ნინოს სახელობის ობოლ და მზრუნველობამოკლებულ ბავშვთა პანსიონატში იმყოფება. 

მიუხედავად, იმის, რომ საქართველოში ქრისტიანობა პირველად უფლის მოციქულებმა იქადაგეს, ქართველთა გაქრისტიანება IV საუკუნის დასაწყისში, სწორედ წმინდა ნინოს ღვაწლს უკავშირდება, ამიტომაც 27 იანვარს, საქართველოში წმინდა ქალწულის ხსენების დღე „ნინოობა“ აღინიშნება.

უწმინდესისა და უნეტარესის, საქართველოს კათალიკოს-პატრიარქის, ილია II–ის ლოცვა-კურთხევით და მეუფე სპირიდონის უდიდესი ღვაწლით დაარსებულ, ჯავახეთის წმინდა ნინოს სახელობის სკოლა-პანსიონატში, სხალთის ეპარქიის მთავარეპისკოპოსის მეუფე სპირიდონის, საქართველოს პარლამენტის წევრის, ანზორ ბოლქვაძისა და მაღალმთიანი აჭარის მუნიციპალიტეტის გამგეობების ინიციატივითა და ხელშეწყობით, წმინდა ნინოს ხსენების დღის საზეიმოდ აღნიშვნას 2010 წლიდან ჩაეყარა საფუძველი.

დღესაც, ტრადიციულად, ნინოწმინდას ობოლ ბავშვთა სკოლა-პანსიონატში საზეიმო წირვის შემდეგ, რომელიც მეუფე სპირიდონმა აღავლინა, „ნინოობისადმი“ მიძღვნილი საზეიმო კონცერტი გაიმართა, სადაც მონაწილეობდნენ ხულოს, შუახევისა და ქედის მხატვრული და ქორეოგრაფიული კოლექტივები.

„ოჯახური გარემო, სწავლისა და დასვენებისათვის შესაფერისი პირობები, სითბო, სისუფთავე, სახელმძღვანელოები, ყურადღებიანი და განათლებული პედაგოგები, მშობლიური მზრუნველობა, აქ, ამ სკოლა-პანსიონატში ყველა პირობაა შექმნილი რაც მოსწავლეებს ხარისხიანი განათლების მიღებისა და სამომავლოდ რეალიზების საშუალებას მისცემს, მადლობას გიხდით მეუფეო დიდი ღვაწლისათვის, რისი დამსახურებითაც სანიმუშოდ მუშაობს ეს სასწავლო დაწესებულება, მადლობას ვუხდი პედაგოგებს, დამხმარე პერსონალს, „ნინოობას“ გილოცავთ თითოეულ თქვენგანს, სრულიად საქართველოს და ამ სახელის მატარებელ ყველა ქალბატონს, წმინდა ნინოს მადლი შეგეწიოთ“, - ასე მიმართა ანზორ ბოლქვაძემ დამსწრე საზოგადოებას.

ანზორ ბოლქვაძემ სკოლა-პანსიონატის მოსწავლეებს სამახსოვრო საჩუქრები გადასცა.

ღონისძიებას ესწრებოდნენ, ხიჭაურისა და ბათუმის შ. რუსთაველის სახელობის უნივერსიტეტის პროფესორ მასწავლებლები. ხულოს, შუახევისა და ქედის მერიისა და საკრებულოს წარმომადგენლები და პირველი პირები.