ახმეტის მაჟორიტარი დეპუტატი გელა სამხარაული ახმეტა-თიანეთის საავტომობილო გზის სარეაბილიტაციო სამუშაოების მიმდინარეობას გაეცნო. სამუშაოებს ტენდერში გამარჯვებული აზერბაიჯანული კომპანია AGT Menegment, Meslehet, Tikinti Xidmetleri MMC ასრულებს, პროექტის ღირებულება 18 964 873 ლარია.

„პროექტი, რომელიც მსოფლიო ბანკის დაფინანსებით ხორციელდება, უმნიშვნელოვანესია კახეთის რეგიონისთვის. ახმეტა- თიანეთის საავტომობილო გზის მშენებლობა რეგიონული განვითარების პროცესის ნაწილია. სარეაბილიტაციო სამუშაოები შარშან უნდა დაწყებული, თუმცა გარკვეულ დეტალებზე შეთანხმებას და პროექტთან დაკავშირებული ხარვეზების გასწორებას დრო დასჭირდა, რამაც პროცესი გააჭიანურა. ეს 30-კილომეტრიანი გზის მონაკვეთია, რომლის კაპიტალური რეაბილიტაცია ახმეტიდან დაიწყო და დაახლოებით 20 თვეში უნდა დასრულდეს. საპროექტო გზის ახმეტა-თიანეთის მონაკვეთი გადის ილტოს ხეობის სოფლებზე და კვეტერას ეკლესიის ტერიტორიაზე. გზა ერთმანეთთან აკავშირებს დასახლებულ სოფლებს რეგიონულ ცენტრთან და თიანეთის რეგიონს კახეთის რეგიონთან. ეს არის ფშავ-ხევსურეთთან, ყაზბეგთან და რუსეთის საზღვართან დამაკავშირებელი უმოკლესი გზა. რეგიონული განვითარებისთვის მოწესრიგებული საგზაო ინფრასტრუქტურა აუცილებელია. პროექტის განხორციელება ეკონომიკურად კიდევ უფრო საინტერესოს გახდის რამდენიმე რეგიონს და ბევრ დამატებით ფუნქციას შესძენს. განსაკუთრებით საინტერესო გახდება ტურისტული მიმზიდველობის თვალსაზრისით. შემცირებული მანძილი და მოწესრიგებული გზა ვიზიტორების რაოდენობას საგრძნობლად გაზრდის. რა თქმა უნდა შეიცვლება ადგილობრივთა სოციალურ- ეკონომიკური პირობები“, - განაცხადა გელა სამხარაულმა.