ფრაქცია „ევროპული საქართველო-რეგიონების“ წევრი, ზურაბ ჭიაბერაშვილი ევროპის საბჭოს საპარლამენტო ასამბლეის მონიტორინგის კომიტეტის წევრებს შეხვდა. შეხვედრაზე საუბარი შეეხო საარჩევნო სისტემასთან და მართლმსაჯულებასთან დაკავშირებულ საკითხებს, ასევე, პოლიტიკური სტატუსის მქონე პირების წინააღმდეგ წარმოებულ სისხლის სამართლებრივ საქმეებს.

როგორც ზურაბ ჭიაბერაშვილმა შეხვედრის დასრულების შემდეგ, მედიის წარმომადგენლებთან განაცხადა დიდია საერთაშორისო თანამეგობრობის წვლილი იმ შეთანხმების მიღწევაში, რაც ხელისუფლებასა და მთელ დანარჩენ პოლიტიკურ სპექტრს შორის შედგა და ახლა მთავარია ამ შეთანხმების დროული და სრული რეალიზება.

„ძალიან დიდია საერთაშორისო თანამეგობრობის წვლილი იმ შეთანხმების მიღწევაში, რაც მოხდა „ქართულ ოცნებასა“ და მთელ დანარჩენ პოლიტიკურ სპექტრს შორის, იმისათვის, რომ ციხიდან იქნან გამოშვებული პოლიტიკური პატიმრები და შეიცვალოს საარჩევნო სისტემა პროპორციულთან ყველაზე მეტად მიახლოებული სისტემით. ბუნებრივია ჩვენი საუბარი ევროსაბჭოს საპარლამენტო ასამბლეის მონიტორებთან შეეხო სწორედ ამ საკითხს, რომ ახლა მთავარი არის ამ შეთანხმების დროული და სრული რეალიზება რათა ორივე პრინციპი რაც დააყენა საზოგადოებამ და პოლიტიკურმა სპექტრმა „ქართულ ოცნებასთან“ და რაც ჩაიდო შეთანხმებაში, შესრულდეს ყოველგვარი დაბრკოლების გარეშე“, - განაცხადა ზურაბ ჭიაბერაშვილმა.

მისივე თქმით, მნიშვნელოვანია, რომ მივიღოთ ისეთი საარჩევნო გარემო არჩევნების წინ, რაც პოლიტიკურ პარტიებს საარჩევნო კამპანიის სრულფასოვნად ჩატარების შესაძლებლობას მისცემს.