პარლამენტის სპორტისა და ახალგაზრდულ საქმეთა კომიტეტის და ფრიდრიხ ებერტის ფონდის სამხრეთ კავკასიის ოფისის ინიციატივით, ადგილობრივი თვითმმართველობების დონეზე ახალგაზრდული პოლიტიკის განხორციელების შესწავლის მიზნით, თბილისსა და იმერეთის რეგიონის მუნიციპალიტეტებში სპეციალური კვლევები ჩატარდა. კვლევის შედეგების გაცნობის მიზნით გამართულ ღონისძიებაზე სპორტისა და ახალგაზრდულ საქმეთა კომიტეტის თავმჯდომარემ, მიხეილ ყაველაშვილმა კვლევის მნიშვნელობასა და მუნიციპალიტეტების დონეზე ახალგაზრდული პოლიტიკის განხორციელების პროცესში გამოვლენილ პრობლემებსა და გამოწვევებზე ისაუბრა. 

„ახალგაზრდობის როლი ქვეყნის განვითარებაში მნიშვნელოვან საკითხს წარმოადგენს, სწორედ ამიტომ, საპარლამენტო კომიტეტი და ზოგადად, ხელისუფლება მიზანმიმართულ ქმედებებს ახორციელებს, რომ რაც შეიძლება სწრაფად მოვახერხოთ ჩვენი ახალგაზრდების უფრო მეტად ინტეგრირება სამოქალაქო ცხოვრებაში და ქვეყნის განვითარების პროცესში. ამასთან დაკავშირებით, კომიტეტმა არაერთი მნიშვნელოვანი ღონისძიება განახორციელა და ერთ-ერთი ასეთი აქტივობა კომიტეტმა ფრიდრიხ ებერტის ფონდთან ერთად განახორციელა, რომელიც იმერეთის რეგიონის 13 მუნიციპალიტეტში და ქალაქ თბილისში კვლევების ჩატარებას წარმოადგენს. კვლევების შედეგებიდან ორ მნიშვნელოვან ფაქტორს გამოვყოფ: პირველი - დასაქმების პრობლემა, ახალგაზრდების თვითრეალიზება და მოტივაციის ამაღლება და მეორე - არაფორმალური განათლება, რომელზეც უფრო მეტი ძალისხმევაა საჭირო. კვლევის შედეგად გამოიკვეთა, რომ ახალგაზრდები მათი მოთხოვნილებების გადაწყვეტას ძირითადად მუნიციპალიტეტებიდან მოელიან და ნაკლებია მათი მხრიდან წამოსული ინიციატივები. კვლევამ აჩვენა, რომ ახალგაზრდებს შეიძლება სხვა მოთხოვნილებები ჰქონდეთ, მუნიციპალიტეტები კი მათ სხვა მიმართულებებს სთავაზობენ“, - განაცხადა მიხეილ ყაველაშვილმა.

კომიტეტის თავმჯდომარის ინფორმაციით, პარლამენტში, კომიტეტის დონეზე ახალგაზრდული პოლიტიკის კონცეფციის შექმნისთვის სამუშაო ჯგუფი მუშაობს, სადაც თითქმის ყველა ახალგაზრდული ორგანიზაციაა ჩართული. ასევე კომიტეტის ინიციატივით, პრემიერმინისტრის დაქვემდებარებაში მოექცა ახალი უწყება - ახალგაზრდობის სააგენტო, რომელიც ახალგაზრდობის საკითხებზე მომუშავე სხვადასხვა რგოლის კოორდინაციას ახდენს.

„როცა ვსაუბრობთ ახალგაზრდების განვითარებაზე, აუცილებელია რომ ყველა რეფორმა მათი ჩართულობით მოხდეს, ჩვენი დევიზია „ახალგაზრდებისთვის და ახალგაზრდებთან ერთად“, რომელიც სწორედ იმას გულისხმობს, რომ მათ მოვუსმინოთ, მათ ვკითხოთ რა და როგორ სურთ და ჩვენ შევქმნათ შესაძლებლობების სივრცეები, სადაც ახალგაზრდების პოტენციალის რეალიზება მოხდება“, - აღნიშნა მიხეილ ყაველაშვილმა.

ღონისძიების მონაწილეებს სპორტისა და ახალგაზრდულ საქმეთა კომიტეტის წევრი ირინა ფრუიძე მიესალმა, რომელმაც ფრიდრიხ ებერტის ფონდის წარმომადგენლობას და კვლევის ავტორის - ანალიზისა და კონსულტაციების ჯგუფს, განხორციელებული საქმიანობისთვის მადლობა გადაუხადა.

კონფერენციაზე, რომელსაც იმერეთის სამხარეო ადმინისტრაციის წარმომადგენლები, ახალგაზრდობის სააგენტოს ხელმძღვანელობა, სამოქალაქო სექტორის წევრები და დარგის ექსპერტები დაესწრნენ, ფრიდრიხ ებერტის ფონდის სამხრეთ კავკასიის წარმომადგენლობის ხელმძღვანელი, ფელიქს ჰეტი მიესალმა, რომელმაც კომიტეტთან ერთობლივად განხორციელებულ პროექტზე და მის შედეგებზე ისაუბრა.

მისასალმებელი ნაწილის შემდეგ კვლევის ავტორმა, ანალიზისა და კონსულტაციის ჯგუფის უფროსმა მკვლევარმა, კესო ესებუამ უშუალოდ კვლევის პრეზენტაცია წარადგინა და დეტალურად ისაუბრა კვლევის მეთოდოლოგიაზე, სამიზნე აუდიტორიებთან მუშაობის მექანიზმებზე, ძირითად გამოწვევებზე. მომხსენებელმა კონფერენციის მონაწილეებს დასკვნები, რეკომენდაციები და მიგნებებიც გააცნო.

ღონისძიება დისკუსიით გაგრძელდა, სადაც მოწვეულმა სტუმრებმა, განათლების და ახალგაზრდობის საკითხების ექსპერტებმა და მუნიციპალიტეტის წარმომადგენლებმა მოსაზრებები და წინადადებები გამოთქვეს.