სპორტისა და ახალგაზრდულ საქმეთა კომიტეტის თემატური მოკვლევის სამუშაო ჯგუფმა - „ახალგაზრდების დასაქმების ხელშეწყობა“ პირველი ზეპირი მოსმენა გამართა.

სამუშაო ჯგუფის წევრებმა იურიდიული და ფიზიკური პირების მიერ მომზადებული რეკომენდაციები და მოსაზრებები განიხილეს და მათ ავტორებთან რიგი საკითხები დააკონკრეტეს.

კომიტეტის თავმჯდომარის, მიხეილ ყაველაშვილის განცხადებით, რეკომენდაციების და წინადადებების რაოდენობამ კარგად აჩვენა თუ რამდენად მნიშვნელოვან და საინტერესო საკითხს წარმოადგენს ახალგაზრდების დასაქმების ხელშეწყობა.

თემატური მოკვლევის ჯგუფი სამუშაო პროცესში ყურადღებით შეისწავლის დაინტერესებული პირების მიერ მომზადებულ წინადადებებს და სათანადო რეკომენდაციებით შესაბამის უწყებებს მიმართავს.

თემატური მოკვლევის ზეპირ მოსმენაზე სხვადასხვა ორგანიზაციის, კერძოდ სსიპ - დასაქმების ხელშეწყობის სახელმწიფო სააგენტოს, ასოციაცია „ჰერა 21“, ააიპ „გილდია“, საქართველოს დამსაქმებელთა ასოციაციის, საქართველოს ახალგაზრდულ მუშაკთა ასოციაციის და ფიზიკური პირების მოსმენა გაიმართა, რომლებმაც ახალგაზრდების დასაქმების ხელშეწყობის საკითხებზე და მიმართულებებზე ისაუბრეს.

„თემატური მოკვლევის ჯგუფში დაახლოებით 20-მდე სხვადასხვა ორგანიზაციის რეკომენდაცია შემოვიდა, დღეს იყო პირველი ზეპირი მოსმენა, სადაც ექვს ორგანიზაციასთან და ორ ინდივიდუალურ წარმომადგენელთან საინტერესო დისკუსია და მსჯელობა გავმართეთ. თემა არ არის მარტივი, რადგან დასაქმების საკითხი საკმაოდ რთულად დგას ქვეყანაში, მითუმეტეს ახალგაზრდებს შორის, რომლებიც ყველაზე მნიშვნელოვანი და მოწყვლადი ჯგუფია. ყველას ძალისხმევაა საჭირო, რომ რაც შეიძლება მეტი ახალგაზრდა იყოს დასაქმებული და მათ ჰქონდეთ შესაძლებლობები და კარიერული წინსვლის გზა ჩვენს ქვეყანაში. სწორედ ამას ემსახურება ეს თემატური მოკვლევაც, სადაც განვიხილავთ შემოსულ მოსაზრებებს და წინადადებებს, შემდეგ მოვამზადებთ ანგარიშს და რეკომენდაციებს, რომლებიც შესაბამის უწყებებს და სამსახურებს დაეგზავნებათ. კომიტეტი კი საზედამხედველო ფუნქციის ფარგლებში რეკომენდაციების შესრულების პროცესს შესაბამის მონიტორინგს გაუწევს“, - განაცხადა მიხეილ ყაველაშვილმა.

თემატური მოკვლევა ევროკავშირისა (EU) და გაეროს განვითარების პროგრამის (UNDP) ხელშეწყობით და ვესტმინსტერის დემოკრატიის ფონდთან (WFD) თანამშრომლობით ხორციელდება.