პარლამენტმა მესამე მოსმენით განიხილა და 88 ხმით მხარი დაუჭირა პარლამენტის რეგლამენტის პროექტს „საქართველოს პარლამენტის რეგლამენტში ცვლილების შეტანის შესახებ“, რომელიც საპარლამენტო კონტროლის მექანიზმების გაზრდას ითვალისწინებს. „საქართველოსთვის კანდიდატის სტატუსის მისანიჭებლად, ევროკავშირის მიერ შემუშავებულ 12 რეკომენდაციიდან მეორე პუნქტი ითვალისწინებდა სწორედ საპარლამენტო კონტროლის მექანიზმების გაზრდას, მის გაძლიერებას და დახვეწას. მსურს კიდევ ერთხელ გამოვხატო მადლობა იმასთან დაკავშირებით, რომ ამ ცვლილებების მომზადებაში პარლამენტის წევრების ჩართულობა იყო მაღალი. მნიშვნელოვანია, რომ კანონპროექტი პირველი და მეორე მოსმენით ყველა პოლიტიკური ჯგუფის და ფრაქციის მონაწილეობით იყო მიღებული“, - განაცხადა საპროცედურო საკითხთა და წესების კომიტეტის თავმჯდომარე ირაკლი ქადაგიშვილმა. aმისი თქმით, მესამე მოსმენისთვის კანონპროექტი მხოლოდ რედაქციულად გასწორდა. პროექტით კომიტეტის სხდომაზე მოწვევის შესახებ კომიტეტის მოთხოვნასთან, კომიტეტის სხდომაზე თანამდებობის პირების სავალდებულო დასწრებასთან, კომიტეტის სხდომაზე თანამდებობის პირის მოსმენასთან, კომიტეტის გადაწყვეტილების საფუძველზე, კომიტეტის მიერ დადგენილ ვადაში საქართველოს მთავრობის წევრის, პარლამენტის წინაშე ანგარიშვალდებული თანამდებობის პირის, პარლამენტის წინაშე ანგარიშვალდებული ორგანოს ხელმძღვანელის მიერ შესაბამისი დოკუმენტების, დასკვნების და სხვა საჭირო მასალების წარდგენის ვალდებულებასთან და საქართველოს სახელმწიფო უსაფრთხოების სამსახურის უფროსის მიერ წინა წელს გაწეული საქმიანობის შესახებ საჯარო ანგარიშის წარდგენასთან დაკავშირებული საკითხები წესრიგდება.