ახალ ვირუსს სჭირდება ახალი მიდგომები. ვიდრე აგრესიული ტესტირება იქნება შესაძლებელი საქართველო უნდა გადავიდეს მოსახლეობაში კორონავირუსის აქტიურ ზედამხედველობაზე პირველადი ჯანდაცვის რგოლის ჩართულობით
მარიამ ჯაში - ინფექციურ დაავადებებთან ბრძოლის გლობალური საპარლამენტო კავშირის UNITE-ის აღმოსავლეთ ევროპისა და ცენტრალური აზიის რეგიონის თავმჯდომარე, ფრაქცია „დამოუკიდებელი დეპუტატების“ თავმჯდომარე
COVID-19 პანდემიის პირობებში დღემდე საქართველომ ეფექტურად მართა სასაზღვრო ზონებში მაღალი რისკის ჯგუფების ეპიდემიოლოგიური მონიტორინგი, საკარანტინო, სამკურნალო და კონტაქტების კვლევის ღონისძიებები.
თუმცა, კორონავირუსის ინფიცირების შემთხვევები საქართველოში სავარაუდოდ გაიზრდება და ეს არ უნდა გახდეს პანიკის საფუძველი.
რამდენიმე დღეში ინფექციურ დაავადებებთან ბრძოლის გლობალური საპარლამენტო კავშირი UNITE გამოაქვეყნებს ოფიციალურ პოზიციას, ამ ეტაპზე კი მინდა გაგიზიაროთ ჩვენი ფრაქციის ორი ძირითადი რეკომენდაცია:
- სამხრეთ კორეისა და ჩინეთის გამოცდილებით, ჩვენ პირველ რეკომენდაციად კვლავაც რჩება კორონავირუსის შემთხვევების დროული გამოვლენა ფართომასშტაბიანი „აგრესიული“ ტესტირებით. შესაბამისად, მთავრობამ უნდა გამოიყენოს როგორც საკუთარი რესურსი ასევე ბიზნეს სექტორის დაფინანსება და შეიძინოს სწრაფი დიაგნოსტიკური ტესტების რაც შეიძლება მეტი რაოდენობა.
- რადგან მომდევნო 2 კვირა განსაკუთრებით საყურადღებოა და ამ პერიოდში „აგრესიული“ ტესტირება ვერ ჩატარდება, ჩვენი მეორე რეკომენდაციაა, რომ ჯანდაცვის სექტორი გადავიდეს მოსახლეობაში კორონავირუსის აქტიურ ზედამხედველობაზე, ანუ ჩვენი მოქალაქეების ჯანმრთელობის მდგომარეობის შესახებ ინფორმაციის პროაქტიულ შეგროვებაზე.
დღემდე თუკი მთავარი აქცენტი კეთდებოდა ჰოსპიტალური სექტორის მზაობაზე, მოსახლეობის აქტიურ ზედამხედველობაში მნიშვნელოვანია პირველადი ჯანდაცვის რგოლის გააქტიურება, რაც მოსახლეობის 90%-ზე მეტის მოცვის საშუალებას მოგვცემს.
საყოველთაო ჯანდაცვის პროგრამაში და კერძო სადაზღვევო სქემებში ჩართული სოფლის ექიმები, პოლიკლინიკები და ამბულატორიები (ყველა დაწესებულება, ან შერჩევითად) სტანდარტული კითხვარით თავად, პროაქტიულად უნდა დაუკავშირდნენ მათთან რეგისტრირებულ ოჯახებს ტელეფონით/მობილურით ყოველკვირეულად, ან სულ მცირე 2-ჯერ მომდევნო 4 კვირის მანძილზე.
კითხვარი დაავადებათა კონტროლის ეროვნულ ცენტრთან შეთანხმებით და ჯანმო-ს COVID-19 გლობალური ზედამხედველობის რეკომენდაციებში კორონავირუსის „საეჭვო შემთხვევის“ დეფინიციაზე დაყრდნობით უნდა შემუშავდეს.
სატელეფონო გამოკითხვით შესაძლებელი იქნება დადგინდეს ოჯახის რომელიმე წევრს ხომ არ აღენიშნება კორონავირუსზე საეჭვო ნიშნები, ხომ არ ჰქონიათ მოგზაურობის საყურადღებო ისტორია ან შესაძლო კავშირი ვირუსით ინფიცირებულ პირებთან. შედეგად შესაძლებელი იქნება კორონავირუსით სავარაუდოდ ინფიცირებული პირების უფრო აქტიური გამოვლენა, მათი მიზნობრივი ტესტირება, დროული და წარმატებული მკურნალობა.
ამასთანავე, სატელეფონო საუბრით შესაძლებელი იქნება დეტალური ინფორმაციის მიწოდება, როგორ უნდა მოიქცეს და ვის მიმართოს ოჯახმა კორონავირუსის სიმპტომების გამოვლენის ან მათზე ეჭვის შემთხვევაში.
უცხო ქვეყნის მოქალაქეებისათვის, რომელთაც არ აქვთ მოქმედი სამედიცინო დაზღვევა საქართველოში, აქტიური ზედამხედველობა შესაძლოა დამატებით განხორციელდეს განათლებისა და ტურიზმის სექტორის ჩართულობით:
უნივერსიტეტებს სტუდენტებისა და პედაგოგიური კორპუსის დახმარებით შეუძლიათ ანალოგიური სატელეფონო გამოკითხვების განხორციელება ყველა უცხოელ სტუდენტთან, რომელიც მათთან სწავლობს.
ასევე, მიუხედავად ტურისტების მკვეთრად შემცირებული ნაკადებისა, სტანდარტული კითხვარები შეიძლება დაურიგდეთ სასტუმროს ადმინისტრაციებს, რათა მოხდეს მათთან რეგისტრირებული სტუმრების ჯანმრთელობის მდგომარეობის რეგულარული გადამოწმება.
ჯანმრთელობის მსოფლიო ორგანიზაცია COVID-19-ს ახალ ვირუსს უწოდებს, ახალ ვირუსს კი სჭირდება ახალი მიდგომები და ინოვაციები. რამდენადაც თავად ვირუსის შესახებ ინფორმაცია მწირია, მოსახლეობაში კორონავირუსის აქტიური ზედამხედველობით, საქართველოს შეუძლია გადადგას ინოვაციური ნაბიჯი და განსაკუთრებული წვლილი შეიტანოს პანდემიასთან ბრძოლის მიდგომებში გლობალურ დონეზე.
