ვაშინგტონში ვიზიტით მყოფმა საქართველოს პარლამენტის დელეგაციამ, პარლამენტის თავმჯდომარის პირველი მოადგილის, თამარ ჩუგოშვილის ხელმძღვანელობით, ამერიკის იურისტთა ასოციაციაში (ABA) შეხვედრა გამართა. 

დელეგაციის წევრები ამერიკის იურისტთა ასოციაციისა (ABA) და არასამთავრობო ორგანიზაციათა კოალიციის - „alliance for justice“ წარმომადგენლებს შეხვდნენ.

შეხვედრის მიზანი ქართული დელეგაციის მხრიდან იყო ფედერალური მოსამართლეების, მათ შორის, უზენაესი სასამართლოს მოსამართლეების შერჩევა/დანიშვნის პროცესში არასახელმწიფო ორგანიზაციების ჩართულობის პროცესის შესწავლა.

ამერიკის იურისტთა ასოციაციის წარმომადგენლებმა ისაუბრეს თუ როგორ ახდენენ სპეციალურად შექმნილი კომიტეტის მეშვეობით მოსამართლეობის კანდიდატების შეფასებას დადგენილი კრიტერიუმების მიხედვით და აღნიშნეს, რომ მათი კრიტერიუმებია როგორც კეთილსინდისიერება და პროფესიონალიზმი, ასევე სამოსამართლო უნარები. 

არასამთავრობო ორგანიზაციათა კოალიციის - „alliance for justice“ წარმომადგენლებმა დელეგაციის წევრებს გააცნეს თუ როგორ ახდენენ მოსამართლეობის კანდიდატები შეფასებას და მათთან დაკავშირებული ანგარიშების გამოქვეყნებას საჯაროდ. საუბარი, ასევე შეეხო მოცემული ორგანიზაციების წარმომადგენლების სენატში, უშუალოდ მოსამართლეების დამტკიცების პროცესში მონაწილეობას, ასევე მათ მიწვევას და მათი მოსაზრებების მოსმენას სენატორების მხრიდან. 

მასპინძლებმა დელეგატებს გააცნეს სხვადასხვა დოკუმენტები, სხვადასხვა ფორმები, რომლებსაც ისინი იყენებენ ამ პროცესში. შეხვედრისას საუბარი შეეხო ისეთ საკითხებსაც, როგორიც არის: ფედერალური და უზენაესი სასამართლოს მოსამართლეების შერჩევა/დანიშვნის პროცესში ადვოკატების, ადვოკატთა ასოციაციის და არასამთავრობო ორგანიზაციების როლს.
ამერიკის იურისტთა ასოციაციაში (ABA) გამართული შეხვედრით საქართველოს პარლამენტის დელეგაციამ აშშ-ში ვიზიტი დაასრულა.

დელეგაციის წევრები ვაშინგტონს ამერიკის შეერთებული შტატების განვითარების სააგენტოს (USAID) პროგრამების - „დემოკრატიული მმართველობის ინიციატივა“ (GGI) და „კანონის უზენაესობის მხარდაჭერა საქართველოში” (PROLoG) ერთობლივი ინიციატივის ფარგლებში 3 ივნისს ეწვივნენ. 

ვიზიტის მიზანი იყო ამერიკის შეერთებული შტატების საკანონმდებლო ორგანოს საქმიანობის ფედერალურ დონეზე შესწავლა. დელეგაციის წევრები ამერიკელი კოლეგების საქმიანობას გაეცნენ და შეხვედრები გამართეს შემდეგ საკითხებზე: აშშ-ს მთავრობასა და კონგრესს შორის ურთიერთობების დინამიკა - როგორ ხორციელდება საპარლამენტო ზედამხედველობა ფედერალურ და შტატების დონეზე; აშშ-ს კონგრესში კომიტეტების საქმიანობა საზედამხედველო ფუნქციის განხორციელების პროცესში; საკომიტეტო მუშაობა ბიუჯეტის დაგეგმვის ეტაპზე და ფინანსებზე ზედამხედველობა; მოსამართლეთა დანიშვნის წესი და სასამართლოზე ზედამხედველობა; კონგრესის კვლევითი ცენტრის (CRS) საქმიანობის შესწავლა.

დელეგაციის შემადგენლობაში შედიან პარლამენტის წევრები: თამარ ჩუგოშვილი, ირაკლი კოვზანაძე, აკაკი ზოიძე, კახაბერ კუჭავა, ანრი ოხანაშვილი, ოთარ დანელია, გიორგი კახიანი, ნინო გოგუაძე, მამუკა მდინარაძე, ოთარ კახიძე, თინათინ ბოკუჩავა, ასევე პარლამენტის აპარატის უფროსი გივი მიქანაძე და აპარატის უფროსის მოადგილე დავით გელაშვილი.