14 მაისს პარლამენტის თავმჯდომარის მოადგილე, ილია ნაკაშიძე კომპანია შპს „ზუგოს“  ესტუმრა და შეხვედრა გამართა მის წარმომადგენელთან, კომპანიის დირექტორთან, გენადი ტაკიძესთან.

მათ განიხილეს საწარმოში მიმდინარე პრობლემები და სამომავლო განვითარების პერსპექტივები.

შპს „ზუგო“ ფუნქციონირებს 2010 წლიდან.

კომპანიამ საწყის ეტაპზე დაიწყო მზა პროდუქციის (პოლიეთილენის პარკი და ერთჯერადი სამომხმარებლო პროდუქცია) იმპორტი და რეალიზაცია.

2013 წელს კომპანიამ შეიძინა პოლიეთილენის პარკების საწარმო, რათა შეექმნა ადგილობრივი წარმოების კონკურენტუნარიანი პროდუქცია.

2015 წელს კომპანიისათვის ცნობილი გახდა, რომ ქვეყანაში მიმდინარეობდა პროგრამა „ნარჩენების მართვის ტექნოლოგია რეგიონებში” (USAID WMTR II program), რომელსაც USAID-ის ფინანსური მხარდაჭერით ახორციელებდა ორგანიზაცია CENN.

აღნიშნული პროგრამის საგრანტო კონკურსში გამარჯვების შედეგად, კომპანიას გადაეცა პოლიეთილენის ნარჩენების გადამამუშავებელი თანამედროვე დანადგარები, რომელთა დახმარებითაც კომპანიამ დაიწყო პოლიეთილენის ნარჩენების გადამუშავების/წარმოების საქმიანობა.

ამ ეტაპზე კომპანიაში ყოველთვიურად გადამუშავდება 5-10 ტონა პოლიეთილენის ნარჩენი.

პოლიეთილენის პარკების წარმოების აკრძალვის შემდეგ შპს ზუგომ შეძლო საწარმოო ხაზის გადაიარაღება და დაიწყო ბიოდეგრადირებადი და კომპოსტირებადი პარკების საცდელი წარმოება, პარალელურად წარმოებულ პროდუქციაზე ავსტრიის შესაბამისი მასერტიფიცირებელი ორგანოზაციისგან მოიპოვა საერთაშორისო სერთიფიკატი და ამიერკავკასიაში პირველად დაიწყო სერტიფიცირებული ბიოდეგრადირებადი და კომპოსტირებადი პარკების წარმოება.

კომპანია მუდმივად ცდილობს მოერგოს ახალ რეალობებს, განვითარდეს, გაზარდოს ბიზნესის მასშტაბები და სამუშაო ადგილები.

თუმცა, ამჟამად არსებული სართაშორისო მძლავრი გამოწვევების წინაშე კომპანია ვერ შეძლებს გადარჩენას სახელმწიფო დახმარების გარეშე.

საქმე იმაშია, რომ პოსტპანდემიური ეკონომიკური კრიზისის პირობებში მოსალოდნელია კონკურენციის ზრდა საერთაშორისო გიგანტ კომპანიებს შორის, რაც, ბუნებრივია, ჩაძირავს მცირე და საშუალო სიმძლავრის საწარმოებებს.

აღნიშნულიდან გამომდინარე, იმისათვის რომ საწარმომ გაუძლოს საერთაშორისო გამოწვევებს, აუცილებელია ბიზნესის წარმადობის და პროდუქციის მრავალფეროვნების რადიკალური ზრდა.

შესაბამისად, შპს ზუგო გეგმავს ბიოდეგრადირებადი და კომპოსტირებადი პარკების წარმოების და პოლიეთილენის ნარჩენის გადამუშავების მნიშვნელოვან ზრდას არსებულ ტექნოლოგიურ ხაზებში სათანადო მანქანა დანადგარების დამატებით.

აღნიშნული კომპანიას მისცემს შესაძლებლობას ყოველთვიურად გადაამუშაოს 100-120 ტონა პოლიეთილენის ნარჩენები, აწარმოოს 150-170 ტონა ბიოდეგრადირებადი და კომპოსტირებადი პროდუქცია, დაასაქმოს დამატებით 20-30 ადამიანი (ამ ეტაპზე კომპანიაში დასაქმებულია 56 თანამშრომელი) და თავისი წვლილი შეიტანოს მწვანე ეკონომიკის განვითარებაში.

პროექტის განხორციელებისთვის (რაც თავისთავად ნიშნავს კომპანიის გადარჩენას) კომპანიას ესაჭიროება ტერიტორია ქალაქ ბათუმის სამრეწველო ზონაში, სადაც შეძლებს მოათავსოს საჭირო შენობა/ნაგებობები და გამართოს სრული საწარმოო ხაზი.

სამწუხაროდ, ფინანსური მდგომარეობიდან გამომდინარე შეუძლებელია ტერიტორიის და საწარმოო ხაზის (საჭირო შენობა/ნაგებობებით) ერთდროულად შეძენა. ამ ეტაპზე კომპანია ეძებს გზებს ზემოაღნიშული პროექტის განხორციელებისათვის.