აფხაზეთის კონფლიქტის შეფასება ოცდახუთი წლის გადასახედიდან, ოკუპირებულ აფხაზეთში დღეს არსებული მდგომარეობა და ქართულ-აფხაზური სავაჭრო ურთიერთობების პერსპექტივა იყო დღევანდელი კონფერენციის მთავარი თემები. 

კონფერენცია პარლამენტში დღეს ფრაქცია „ქართული ოცნება-მრეწველების“ და აფხაზეთის ავტონომიური რესპუბლიკის მთავრობის ინიციატივით გაიმართა.

„25 წლის წინათ დატრიალდა ეს ტრაგედია და ამ გადასახედიდან ქართველებიც და აფხაზებიც ვხედავთ რა მივიღეთ. ეს დიდი ტრაგედია იყო ახლადფეხადგმული ქართული სახელმწიფოსთვისაც, როდესაც მას ტერიტორია ძალით ჩამოაჭრეს, დროებით რა თქმა უნდა. მაგრამ აღმოჩნდა, რომ აფხაზებიც სხვა რამეს ელოდნენ და სხვა რამე მიიღეს“, - განაცხადა ფრაქცია „ქართული ოცნება-მრეწველების“ თავმჯდომარემ, სიმონ ნოზაძემ კონფერენციის გახსნისას.

მან ყურადღება გაამახვილა ქართულ-აფხაზური ურთიერთობის მრავალსაუკუნოვან ისტორიაზე და განაცხადა: „აფხაზებს ერთიან ქართულ სახელმწიფოში ცხოვრების 3-4 ათასწლიანი გამოცდილება აქვთ, ქართველებზე ახლო მეგობარი მათ არ ჰყავთ, ქართველები უქმნიდნენ მათ ყველა პირობას, რომ მათ საარსებო სივრცე ჰქონოდათ, ერთად ჩამოვყალიბდით, როგორც ერები, ერთნაირი კულტურის, ერთნაირი მენტალიტეტის, ერთნაირი ხასიათისა და გარეგნობის მქონე ხალხი“.

სიმონ ნოზაძემ დღეს არსებული მდგომარეობის შეფასებისას აღნიშნა, რომ აფხაზეთში ურთულესი სიტუაციაა შექმნილი.

„აფხაზურ საზოგადოებაში იგრძნეს საფრთხე, რომ მათ იდენტობას, მათ ეროვნულ ცნობიერებას საფრთხე ექმნება. ისინი ვერ აკონტროლებენ საზღვარს, ვერც პოლიტიკას, ეკონომიკაც სხვა ხალხის ხელში გადადის ნელ-ნელა, ამ საფრთხეების წინაშე დგანან, მაშინ როდესაც ქართველები უზრუნველყოფდნენ მათ ეკონომიკურ განვითარებასაც, მათ განათლებასაც და არასდროს ეჭირათ თვალი მათ ქონებაზე“, - განაცხადა დეპუტატმა.

პარლამენტის თავმჯდომარის მოადგილემ, გიორგი ვოლსკიმ მოკლე ისტორიული მიმოხილვის შემდეგ განაცხადა: „დგება დრო, როდესაც საჭიროა მომავალში გავიხედოთ და წარსულის უფრო სიღრმისეული შეფასებით დავგეგმოთ ის სტრატეგიული მიმართულება, რამაც შეიძლება ამ მდგომარეობიდან ამოგვიყვანოს. დღევანდელი შეხვედრა თავის მნიშვნელოვან წვლილს შეიტანს ამ სტრატეგიის ჩამოყალიბებაში“.

აფხაზეთის მთავრობის თავმჯდომარის მოვალეობის შემსრულებელმა, ვახტანგ ყოლბაიამ თავის გამოსვლაში გულისტკივილით აღნიშნა, რომ აფხაზეთში შექმნილია უმძიმესი სოციალურ-ეკონომიკური მდგომარეობა. კონფლიქტიდან 25 წლის განმავლობაში აფხაზეთში ვითარება არცერთი მიმართულებით არ გაუმჯობესებულა.

„ჩვენთვის უმთავრეს ამოცანას აფხაზურ და ქართულ საზოგადოებებს შორის ნდობის აღდგენა, დევნილი მოსახლეობის საკუთარ სახლებში უსაფრთხო და ღირსეული დაბრუნება და ერთიან სახელმწიფოში მშვიდობიანი თანაცხოვრება წარმოადგენს. საქართველოს ხელისუფლება და საზოგადოება ვთანხმდებით, რომ კონფლიქტის მოგვარების მშვიდობიან გზას ალტერნატივა არ გააჩნია, ხოლო დიალოგი ამის საუკეთესო ინსტრუმენტია. ჩვენი ამოცანაა დავარწმუნოთ ამაში აფხაზები და სერიოზულად ვიმსჯელოთ შემოთავაზებული დიალოგის წარმოებაზე“, - განაცხადა ვახტანგ ყოლბაიამ.

შეხვედრაში მონაწილეობდნენ მეცნიერები, ექსპერტები, არასამთავრობო ორგანიზაციების წარმომადგენლები.