ფრაქცია „ქართული ოცნება-მრეწველების“ თავმჯდომარის ინიციატივით, თერჯოლის მუნიციპალიტეტის ცენტრალურ ბიბლიოთეკაში დაცული უძველესი წიგნები, რესტავრაციისა და შემდგომი მოვლა-შენახვისთვის, საქართველოს ეროვნულ ბიბლიოთეკას გადაეცა. 

ვახტანგ VI-ის სტამბაში ნაბეჭდი რარიტეტული წიგნების გადაცემა, 13 აგვისტოს, თერჯოლის მუნიციპალიტეტის ბიბლიოთეკაში, პარლამენტის წევრის, სიმონ ნოზაძის, ეროვნული ბიბლიოთეკის გენერალური დირექტორის მოადგილის, მირიან ხოსიტაშვილის  და საბიბლიოთეკო რესურსების დეპარტამენტის დირექტორის, ლევან თაქთაქიშვილის მონაწილეობით განხორციელდა.

„წიგნები, რომლებიც ჩვენ წამოვიღეთ, ჩემ მიერ იყო აღმოჩენილი. ჩვენ ინფორმაცია გვქონდა თერჯოლის ბიბლიოთეკის შესახებ, მაგრამ არ ველოდით ასეთ უნიკალურ შემთხვევასთან თუ გვექნებოდა საქმე. აღნიშნული ინფორმაციის მიღებისთანავე დავუკავშირდი ეროვნულ ბიბლიოთეკას, ჩავედით ადგილზე და უშუალოდ გავეცანით მასალებს, რომელთა ნაწილი 250 -300 წლის წინ, ვახტანგ VI-ის სტამბაში, ნუსხური შრიფტით არის დაბეჭდილი. ეროვნულ ბიბლიოთეკას მსგავსი ან მასთან მიახლოებული ეგზემპლარი არ გააჩნია. ცხადია, ობიექტური მიზეზების გამო, ბიბლიოთეკას არ შეეძლო მათი სათანადო მოვლა-პატრონობა, ამიტომ მუნიციპალიტეტის ხელმძღვანელობის გადაწყვეტილებით, წიგნები ეროვნულ ბიბლიოთეკას გადაეცა“, - განაცხადა სიმონ ნოზაძემ.