შოთა ხაბარელი სამგორის რაიონის გამგებლის, კახა სამხარაძის მიერ წარდგენილ ანგარიშს დაესწრო
სამგორის რაიონის მაჟორიტარი პარლამენტის წევრი შოთა ხაბარელი სამგორის რაიონის გამგებლის, კახა სამხარაძის მიერ წარდგენილ ანგარიშს დაესწრო, რომელიც ეხებოდა 2018-2019 წლებში სამგორის გამგეობის მიერ შესრულებულ საქმიანობას და ასევე მიმდინარე და დაგეგმილი პროექტების გაცნობას.
კახა სამხარაძის განცხადებით, 2018-2019 წლებში სამგორის რაიონში მნიშვნელოვანი ინფრასტრუქტურული პროექტები განხორციელდა.
კერძოდ, საგზაო ინფრასტრუქტურა 300 130 კვ.მ ფართობზე მოწესრიგდა, რისთვისაც გამგეობის ბიუჯეტიდან 12 659 834 ლარი გამოიყო. ასფალტის საფარი დაიგო ისეთ ქუჩებზეც, სადაც საგზაო ინფრასტრუქტურა 30-40 წლის განმავლობაში არ მოწყობილა; დედაქალაქს შემოერთებულ ხუთ სოფელში მოწესრიგდა შიდა გზები, მოეწყო სკვერები, სპორტული მოედნები და ფიტნეს ზონები, გარდა ამისა, კაპიტალური რეაბილიტაცია ჩაუტარდა ნასაგურის ცენტრალურ გზას.
სამგორის რაიონის გამგეობა აქტიურად აწესრიგებს მიწისქვეშა კომუნიკაციებსაც. სანიაღვრე ქსელი, წყლისა და წყალარინების სისტემები მოეწყო და რეაბილიტირდა 96 მისამართზე. გარდა ამისა, რაიონის ტერიტორიაზე მოეწყო 34 სკვერი, ამჟამად კი მსგავსი ტიპის სამუშაოები კიდევ სამ მისამართზე მიმდინარეობს.
ჯანსაღი ცხოვრების წესის ხელშეწყობის მიზნით, მოეწყო თანამედროვე სტანდარტების შესაბამისი 38 სპორტული მოედანი; 59 მისამართზე დამონტაჟდა ტრენაჟორები.
„ბინათმესაკუთრეთა ამხანაგობების განვითარების ხელშეწყობის პროგრამის“ ფარგლებში, 385 პროექტი დაფინანსდა; კაპიტალურად გამაგრდა 5 ავარიული საცხოვრებელი სახლი; 113 მისამართზე სახლის სახურავი შეიცვალა; წყალარინების ქსელის რეაბილიტაცია 68 მისამართზე ჩატარდა; რეაბილიტირდა და განახლდა 28 ლიფტი.
მოსახლეობის ჩართულობით, გაიმართა სხვადასხვა ტიპის კულტურული, სპორტული და საგანმანათლებლო 26 ღონისძიება; საცხოვრებელი ფართი საკუთრებაში სიმბოლურ ფასად 201 ოჯახს გადაეცა.
ორი წლის განმავლობაში განხორციელებული პროექტებისთვის სამგორის რაიონის გამგეობის ბიუჯეტიდან ჯამში, 41 121 735 ლარი დაიხარჯა.
პრეზენტაციას ესწრებოდნენ დედაქალაქის მერი კახი კალაძე, დედაქალაქის საკრებულოს თავმჯდომარე გიორგი ტყემალაძე, თბილისის მერის მოადგილე ირაკლი ბენდელიანი, თბილისის მთავრობის წევრები, სამგორის რაიონის მაჟორიტარი დეპუტატები და საკრებულოს წარმომადგენლები.
