ფრაქცია „ქართული ოცნება-მრეწველების“ თავმჯდომარემ სიმონ ნოზაძემ პარლამენტის სტაჟიორებთან შეხვედრა გამართა, სადაც ახალგაზრდებს პარლამენტის სტრუქტურა და მისი საქმიანობის ძირითადი მიმართულებები გააცნო.

„ჩემთვის ახალგაზრდებთან დისკუსია უაღრესად საინტერესოა, ამიტომ მხოლოდ პოლიტიკაზე და პარლამენტის მუშაობაზე არ გესაუბრებით. თქვენ უნდა შექმნათ ჩვენი ქვეყნის მომავალი, პირველ რიგში უნდა გიყვარდეთ და იამაყოთ, რომ ქართული გენის წარმომადგენლები ხართ“,- განაცხადა ფრაქციის თავმჯდომარემ.

გენდერული კვოტირების საკითხზე საუბრისას, სიმონ ნოზაძემ აღნიშნა, საქართველო მოწინავეა იმ ქვეყნებს შორის, რომელმაც ჯერ კიდევ 1918 წელს „საქართველოს ეროვნულ საბჭოში“ ქალები შეიყვანა. 

ახალგაზრდებთან გამართულ შეხვედრაზე პარლამენტის წევრი ბოლო პერიოდში საქართველოს მიერ მიღწეულ წარმატებებს შეეხო და ქართული მრეწველობის განვითარებზე, სოფლის მეურნეობის პროდუქციის ევროკავშირში იმპორტის თემას და დემოკრატიული რეფორმების მნიშვნელობაზე ისაუბრა. „საქართველოს ერთ-ერთი ჯილდოა ვიზის ლიბერალიზაცია, ჩვენ უნდა მოვახერხოთ და გავხდეთ ევროპული ოჯახის ღირსეული წევრი. კავკასიის რეგიონში ჩვენი ქვეყანა მოწინავე ადგილზეა დემოკრატიის, ადამიანის უფლებების დაცვით და ეს კურსი კიდევ უფრო უნდა განვავითაროთ“, - აღნიშნა დეპუტატმა.

სტაჟიორებთან შეხვედრისას სიმონ ნოზაძემ ქვეყნის ოკუპირებული ტერიტორიების საკითხებზე, განათლების რეფორმაზე, დემოგრაფიულ პრობლემებზე და საქართველოს წინაშე არსებულ გამოწვევებზეც ისაუბრა.

შეხვედრა დისკუსიის რეჟიმში გაგრძელდა. ნარკოპოლიტიკის, დაგროვებითი პენსიის, ადამიანის უფლებების და სექსუალური უმცირესობების საკითხებზე, სტაჟიორებმა ფრაქციის თავმჯდომარის მოსაზრებები მოისმინეს.