ფრაქცია „ჩვენი საქართველო-დამოუკიდებელი დეპუტატები“ მომდევნო კვირაში დაარეგისტრირებს ახალ საკანონმდებლო ინიციატივას, რომელიც ითვალისწინებს, რომ საქართველოს ოკუპირებულ ტერიტორიებთან გამყოფი ხაზის მიმდებარე სოფლებში მცხოვრებ მოსახლეობას კანონის დონეზე დაუწესდეს იგივე შეღავათები, რასაც „მაღალმთიანი რეგიონების განვითარების შესახებ“ საქართველოს კანონი ითვალისწინებს.

ამის შესახებ ფრაქციის თავმჯდომარემ, მარიამ ჯაშმა დღეს გამართულ ბრიფინგზე განაცხადა.

მისი თქმით, ინიციატივა ეკუთვნის პარტია „ჩვენი საქართველო-სოლიდარობის ალიანსის“ ზუგდიდის მაჟორიტარობის კანდიდატს, ჯამბულ ნაჭყებიას. ინიციატივის შესაბამისად დაწესდება სოციალური შეღავათები: 20%-იანი დანამატები პენსიონერებისა და სოციალური პაკეტის მიმღებებისათვის, სახელფასო დანამატები სახელმწიფო კლინიკებში დასაქმებული კადრებისა და საჯარო სკოლებისა და კოლეჯების პედაგოგებისათვის. ზამთრის პერიოდში გათბობის უზრუნველყოფის ხელშეწყობა და ყოველთვიურად 100 კვტ.სთ-მდე მოხმარებული ელექტროენერგიის საფასურის 50%-ით ანაზღაურება, პირველი და მეორე ბავშვისათვის ყოველთვიური 100 ლარის დახმარება 1 წლის განმავლობაში, მესამე და ყოველი შემდგომი ბავშვისათვის – 2 წლის განმავლობაში 200 ლარის ფულადი დახმარება. ასევე, ფიზიკური პირებისა და მეწარმეებისათვის საგადასახაო კოდექსით გათვალისწინებული შეღავათები.

ინიციატორის თქმით, „საქართველოს ხელისუფლებამ დაუყოვნებლივ უნდა დააწესოს დამატებითი შეღავათები 500 კმ საოკუპაციო ხაზის მიმდებარე სოფლების მოსახლეობისათვის, რომლებიც იქ ცხოვრებით იცავენ ჩვენს სამშობლოს“.

მარიამ ჯაშის განმარტებით, მართალია მე-9 მოწვევის პარლამენტი ასრულებს მუშაობას, მაგრამ მნიშვნელოვანი იქნება კანონპროექტის დაინიცირება და თუნდაც მე-10 მოწვევის პარლამენტში აღნიშნული ინიციატივის გადატანა.