სპორტისა და ახალგაზრდულ საქმეთა კომიტეტის თავმჯდომარე მიხეილ ყაველაშვილი 2018-2019 წლებში კომიტეტის მიერ ახალგაზრდობის მიმართულებით განხორციელებულ ღონისძიებებს და მის შედეგებს, ეუთოს საპარლამენტო ასამბლეის სესიის ფარგლებში, ევროპელ კოლეგებს გააცნობს. აღნიშნული ინიციატივის შესახებ კომიტეტის თავმჯდომარესა და ახალგაზრდობისა და უსაფრთხოების საკითხებზე მომუშავე ეუთოს წარმომადგენლებს შორის გამართულ შეხვედრაზე ისაუბრეს.

მიხეილ ყაველაშვილმა ევროპელ სტუმრებს ახალგაზრდულ საქმეებზე კომიტეტის მიერ განხორციელებულ აქტივობებზე ინფორმაცია მიაწოდა და კომიტეტთან არსებული სამუშაო ჯგუფის საქმიანობაზე ისაუბრა. მიხეილ ყაველაშვილის განცხადებით, სამუშაო ჯგუფი აერთიანებს ყველა იმ წამყვან არასამთავრობო ორგანიზაციას, რომელიც საქართველოში ახალგაზრდობის საკითხებზე მუშაობს და კომიტეტისა და სამოქალაქო სექტორის ერთობლივი მუშაობის შედეგად მომზადებულ კონცეფციის პროექტს, ახალი დოკუმენტის სახით, პარლამენტის პლენარულ სხდომას წარუდგენს.

შეხვედრაზე ეუთოს წარმომადგენლობითი დელეგაცია პოლიტიკურ მოვლენებთან მიმართებაში ახალგაზრდობის როლით და თანამედროვე გამოწვევების და გლობალური მნიშვნელობის საკითხების მიმართ ახალგაზრდების ჩართულობით დაინტერესდნენ.