ოთარ კახიძე დიდი ბრიტანეთისა და ჩრდილოეთ ირლანდიის გაერთიანებული სამეფოს ელჩს შეხვდა
დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიანმა ელჩმა, ჯასტინ მაკენზი სმიტმა ფრაქცია „ევროპული საქართველოს“ თავმჯდომარეს, ოთარ კახიძეს „საერთაშორისო ლიდერთა შეკრებაში“ მონაწილეობის მიღების დამადასტურებელი სერთიფიკატი გადასცა.
ბრიტანეთის მთავრობის მიერ სპეციალური პროგრამის ფარგლებში გამართულ საერთაშორისო ლიდერთა შეკრება გასული წლის ივნისში ჩატარდა და მასში მონაწილეობა სხვადასხვა ქვეყნის პოლიტიკოსებმა მიიღეს.
პროგრამის ფარგლებში ლიდერი პოლიტიკოსები ლონდონში და ედინბურგში პარლამენტის წევრებთან, არასამთავრობო ორგანიზაციის და ბიზნეს სექტორის წარმომადგენლებთან გამართულ შეხვედრებზე გაერთიანებული სამეფოს პოლიტიკურ სისტემას გაეცნენ.
„ეს არის ძალიან საინტერესო პროგრამა, რომელიც სხვადასხვა ქვეყნის პოლიტიკოსებს საშუალებას აძლევს გაეცნონ გაერთიანებული სამეფოს პოლიტიკურ სისტემას. ეს კი თავის მხრივ საინტერესო და მნიშვნელოვანია, რათა კარგად გავიგოთ თუ როგორ ახერხებს ეს სისტემა საუკუნეების განმავლობაში ისეთ ფუნქციონირებას რომ აქვთ ასეთი წარმატებული და მდიდარი ქვეყანა, სადაც არის დაცული ადამიანის უფლებები, არის კანონის უზენაესობა და დამოუკიდებელი სასამართლო“, - განაცხადა ოთარ კახაძემ.
