საქართველოს პარლამენტის თავმჯდომარის მოადგილე სერგი კაპანაძე და საპარლამენტო უმცირესობის წევრი გიორგი კანდელაკი ბათუმში მიმდინარე მე-14 საერთაშორისო კონფერენციის „საქართველოს ევროპული გზა - რეგიონული სტაბილურობის უზრუნველყოფა“ ფარგლებში ევროკავშირის საგარეო ქმედებათა სამსახურის წარმომადგენლებს შეხვდნენ.

მხარეებმა საქართველოსა და ევროკავშირს შორის სტრატეგიული ურთიერთობების გაღრმავებაზე და ევროპული ინტეგრაციის პერსპექტივებზე ისაუბრეს. საუბარი ასევე საკონსტიტუციო ცვლილებებს, ქვეყნის შიგნით მიმდინარე პროცესებს და ქვეყნის წინაშე არსებულ გამოწვევებსაც შეეხო.

„ვისაუბრეთ საქართველოს ევროინტეგრაციის პერსპექტივებზე, დავაფიქსირეთ, რომ მხარს ვუჭერთ, რომ საქართველო იყოს უფრო ამბიციური ევროინტეგრაციის გზაზე და მიგვაჩნია, რომ ჩვენი და ევროკავშირის სტრატეგიული ურთიერთობები კიდევ უნდა გაღმავდეს, ახალ ეტაპზე გადავიდეს და აუცილებლად წევრობით უნდა დამთავრდეს. გვქონდა საუბარი სიღრმისეულად, ქვეყნის შიგნით არსებულ პრობლემებზე დემოკრატიის კუთხით, საკონსტიტუციო ცვლილებებთან დაკავშირებით და საქართველოს რუსეთთან ურთიერთობებზე,“ - განაცხადა შეხვედრის დასრულების შემდეგ სერგი კაპანაძემ.