საქართველოს პარლამენტის წევრი, ფრაქცია „ქართული ოცნება-მრეწველების“ თავმჯდომარე სიმონ ნოზაძე კავკასიის უნივერსიტეტის სახელმწიფო მართვის სკოლის სტუდენტებსა და პროფესორ-მასწავლებლებს შეხვდა.

შეხვედრაზე სახელმწიფო მართვის ძირითად პრინციპებსა და მიზნებზე ისაუბრეს. დეპუტატმა ყურადღება სახელმწიფო მშენებლობის საქმეში სწორი ხედვისა და ზუსტი ორიენტირების მნიშვნელობაზე გაამახვილა.

შეხვედრაზე საუბარი სახელმწიფოებრივი მშენებლობის საქმეში ქართული კულტურის მნიშვნელობას და საქართველოს ერთიანობისა და ტერიტორიული მთლიანობისთვის აფხაზებთან და ოსებთან კულტურული და ეკონომიკური კავშირების გამყარების აუცილებლობას შეეხო.

დეპუტატმა შეხვედრაზე ქვეყნის მიერ ბოლო პერიოდში მიღწეულ წარმატებებზე ისაუბრა, მან ევროკავშირის მიერ საქართველოსთვის უვიზო მიმოსვლის ამოქმედებაზე გაამახვილა ყურადღება, რაც დეპუტატის თქმით, ახალგაზრდებს განათლების მიღების მეტ შესაძლებლობებს მისცემს.

„სტუდენტებთან შეხვედრას უდიდესი მნიშვნელობა აქვს. თქვენ დღეს უამრავი შესაძლებლობა გაქვთ მიიღოთ კარგი, ხარისხიანი განათლება და წარსულის გათვალისწინებით ქვეყნის მართვაში არ დაუშვათ ის შეცდომები, რომლებმაც სხვადასხვა პერიოდში ჩვენს ქვეყანას დაღი დაასვა. ყოველთვის უნდა გავითვალისწინოთ წარსულის შეცდომები და ვეცადოთ ქვეყნის მართვისას არ გავიმეოროთ ისინი“, - მიმართა სტუდენტებს სიმონ ნოზაძემ.

დეპუტატმა სტუდენტების შეკითხვებს უპასუხა. ფრაქცია „ქართული ოცნება-მრეწველების“ თავმჯდომარის შეხვედრები სტუდენტებთან მომავალშიც გაგრძელდება.