საქართველოს განათლების სისტემისა და მასში არსებული პრობლემების შესახებ ისაუბრეს დღეს პარლამენტში გამართულ შეხვედრაზე, სადაც ფრაქცია „ქართული ოცნება-მრეწველების“ თავმჯდომარე, სიმონ ნოზაძე ახალგაზრდული პარლამენტის განათლების, მეცნიერებისა და კულტურის კომიტეტის წევრებს შეხვდა.

ახალგაზრდები 10 დეკემბრის სტუდენტური კონფერენციისთვის ემზადებიან, სადაც ახალგაზრდული პარლამენტის თითოეული კომიტეტი წარმოადგენს რეკომენდაციებს მათთვის მნიშვნელოვან საკითხებთან დაკავშირებით.

განათლების, მეცნიერებისა და კულტურის კომიტეტის წევრებმა კონფერენციისთვის სარეკომენდაციოდ ორი საკითხი მოამზადეს და პარლამენტის წევრთან, სიმონ ნოზაძესთან ერთად იმსჯელეს თითოეულ მათგანზე.

სტუდენტები მიიჩნევენ, რომ განათლების სისტემის გაუმჯობესებისათვის ერთ-ერთი მნიშვნელოვანი მიმართულება უნდა იყოს მასწავლებლების მაღალი კვალიფიკაცია და რეპეტიტორის ინსტიტუტის გაუქმება, რაც თავისთავად დაკავშირებულია სკოლაში სწავლის ხარისხის ამაღლებასთან. მეორე მიმართულება კი, რასაც ისინი ასევე მნიშვნელოვნად მიიჩნევენ, ეხება დიფერენცირებულ სწავლებას. მათი აზრით სასურველი იქნება IX-XII კლასებში დაინერგოს დიფერენცირებული სწავლების მეთოდი, სადაც მოსწავლეებს საშუალება ექნებათ მათთვის საინტერესო და საჭირო საგნები მეტი დატვირთვით მოამზადონ.

შეხვედრაზე საუბარი შეეხო თანამედროვე განათლების პრობლემებს, სასკოლო ცხოვრებას, მასწავლებლების კვალიფიკაციას, მოსწავლე-მასწავლებლის ურთიერთობებს და სხვა საკითხებს.

პარლამენტის წევრმა, სიმონ ნოზაძემ ახალგაზრდებს მოუწონა განათლების საკითხებისადმი გამოხატული ინტერესი, მოსაზრებები გამოთქვა წამოჭრილ საკითხებთან დაკავშირებით, თუმცა საკონფერენციოდ მოსამზადებელი თემის არჩევანი ახალგაზრდებს დაუტოვა.

„მე მივესალმები თქვენს ამ გადაწყვეტილებას იფიქროთ და იზრუნოთ საშუალო განათლების საკითხებზე და პრობლემებზე. სასიხარულოა, რომ ასეთი მოტივირებული ახალგაზრდები გვყავს. თქვენ მიერ დასმული ორივე საკითხი ძალიან მნიშვნელოვანი მგონია. ვფიქრობ, უმჯობესია იმსჯელოთ და თვითონ გადაწყვიტოთ რომელი მათგანის გატანა იქნება უფრო მნიშვნელოვანი 10 დეკემბერს კონფერენციაზე“, - განაცხადა დეპუტატმა.