2021 წელს საქართველოს პარლამენტის სასახლეში ექვთიმე თაყაიშვილის სახელობის ქართული პარლამენტარიზმის მუზეუმი გაიხსნა. პარლამენტის სასახლის „B“ კორპუსის სარდაფის გამოუყენებელ სივრცეს ახალი დანიშნულება მიეცა.

მუზეუმში თავმოყრილია ყველა მნიშვნელოვანი დოკუმენტი (ასლი), რომლებიც საქართველოში პარლამენტარიზმის განვითარებას ეხება და ჩვენი ქვეყნისა და უცხოეთის სხვადასხვა არქივსა თუ წიგნთსაცავშია დაცული. მუზეუმის კონცეფციიდან გამომდინარე, მასში წარმოდგენილი ექსპოზიცია ასახავს იმ გზას, რომელიც ქართულმა პარლამენტარიზმმა მე-20 საუკუნის დასაწყისიდან დღემდე გაიარა.

მუზეუმისთვის ექვთიმე თაყაიშვილის სახელის მინიჭება შემთხვევითი არ არის. ექვთიმე თაყაიშვილი, როგორც დამფუძნებელი კრების წევრი და ამ კრების თავმჯდომარის მოადგილე, აქტიურად იყო ჩართული საქართველოს პირველი რესპუბლიკის პარლამენტის საქმიანობაში 1919−1921 წლებში, აგრეთვე საქართველოს გასაბჭოების შემდეგ, ემიგრაციაში ყოფნისას. 

მუზეუმის სივრცე დაყოფილია და მოიცავს 1 ცენტრალურ დარბაზს და 4 სივრცეს შესაბამისი ეპოქების მიხედვით. ცენტრალურ დარბაზში („დიდების დარბაზი“) წარმოდგენილ მასალებში ასახულია ყველა მნიშვნელოვანი მოვლენა, რომლებიც საუკუნეზე მეტი ხნის განმავლობაში აყალიბებდა საქართველოში პარლამენტის არსებობის აუცილებლობის იდეას.

მუზეუმის 4 სივრცე შემდეგი პრინციპით დათარიღდა:

1. საქართველოს პარლამენტი (დამფუძნებელი კრება) 1918−1921 წლებში;
2. პარლამენტის (დამფუძნებელი კრების) საქმიანობა ემიგრაციაში;
3. პარლამენტი (საქართველოს სსრ-ის უმაღლესი საბჭო) საბჭოთა პერიოდში (1921−1990 წლებში);
4. პარლამენტი (საქართველოს რესპუბლიკის უზენაესი საბჭო) დამოუკიდებლობის აღდგენის წლებში (1990-1991).

მუზეუმის ყველა სივრცეში ვიზიტორი იხილავს თემატურ ფილმებს, სპეციალურად დამონტაჟებულ ელექტრონულ დაფაზე კი შესაძლებელია ნებისმიერი მოწვევის  პარლამენტის წევრის ბიოგრაფიის ხილვა. სივრცე აღჭურვილია თანამედროვე ტექნოლოგიებით და განკუთვნილია მნახველთა ფართო წრისთვის.

ექვთიმე თაყაიშვილის სახელობის ქართული პარლამენტარიზმის მუზეუმის მონახულება შესაძლებელია როგორც პარლამენტში დაგეგმილი ექსკურსიის ფარგლებში, ისე სურვილის შემთხვევაში, ინდივიდუალურად.