მოგესალმებით კოლეგებო, ბატონო თავმჯდომარე, ნება მომეცით გაგაცნოთ ჩვენი ფრაქციის "უპარტიო, დამოუკიდებელი მაჟორიტარების“ საბოლოო მოსაზრება წარმოდგენილ შრომის კოდექსში შესატან ცვლილებებთან დაკავშირებით და იმ სამუშაო პროცესებზე, რომელიც მიმდინარეობდა კანონშემოქმედების დროს.

კიდევ ერთხელ ვადასტურებთ,რომ მოქმედ კანონში ჩვენთვის მიუღებელი იყო ორი ნორმა:
1) დაქირავებულის გათავისუფლება თანამდებობიდან ყოველგვარი ახსნა-განმარტების და არგუმენტების გარეშე. ახალ კოდექსში დაქირავებულის გათავისუფლება ხდება მხოლოდ დასაბუთებული, ობიექტური არგუმენტების საფუძველზე;
2) მოკლევადიანი ხელშეკრულებების, (მაგალითად ერთ თვიანი) არსებობა, რომელიც მუდმივ რეჟიმში გრძელდება და მუშაკს ამყოფებს სტრესულ მდგომარეობაში სამუშაოს და ანაზღაურების დაკარგვის შიშის გამო, რაც ამცირებს შრომის ნაყოფიერებას.
ახალი კოდექსი ითვალისწინებს უვადო ხელშეკრულებების შემოღებას, რასაც ჩვენ, ფრაქცია აპროტესტებს და თვლის, რომ უნდა იყოს აგრეთვე ვადიანი კონტრაქტებიც.
კანონის განხილვა მიმდინარეობდა დაძაბულ ემოციურ ფონზე. ჩვენ მოვახერხეთ მთელ რიგ საკითხებზე პოზიციების დაახლოება. ვეცადეთ დამსაქმებლების და დასაქმებულების ინტერესების გათვალისწინება და საერთაშორისო ორგანიზაციების მოთხოვნების გაზიარება.
ჩვენ რეკომენდაციებში ვხელმძღვანელობით პრინციპით: ბიზნესის განვითარება, ეკონომიკის ზრდა და შესაბამისად სამუშაო ადგილების შექმნა. როგორი კოდექსი მივიღეთ? ჩემი შეფასებით რბილად რომ ვთქვათ, აღფრთოვანებას არ იწვევს.

მაშინ რატომ ვუჭერთ მხარს კოდექსის საბოლოო ვარიანტს? ჩვენი ფრაქცია აღმოჩნდა არჩევანის წინაშე:
1) ან არ უნდა დაგვეჭირა მხარი კოდექსისათვის გარდა ზემოთ აღნიშნული ორი მუხლისა და გამოვთიშვოდით სამუშაო პროცესს;

2) ან მიგვეღო მონაწილეობა კანონშემოქმედებით მუშაობაში და ჩვენი რეკომენდაციების ნაწილი ოპონენტების მიერ გაზიარებული ყოფილიყო. ჩვენ ავირჩიეთ მეორე გზა.

შედეგად მივიღეთ კოდექსის გაცილებით უკეთესი ვარიანტი ვიდრე ის იყო წარმოდგენილი პირველი მოსმენით.
ფრაქციამ შეძლო ჯანსაღი ოპონირება გაეწია კანონპროექტის ავტორებისათვის და კონსტრუქციული პოზიცია დაეკავა კანონშემოქმედებით მუშაობის პროცესში.
არ მინდა შევეხო კანონის მუხლობრივ განხილვას, მაგრამ კოდექსით შრომით კოლექტივებს და პროფკავშირებს ეძლევათ ფართო უფლებები დასაქმებულთა ინტერესების დასაცავად. მინდა მოვუწოდო პროფკავშირებს ბოროტად არ გამოიყენონ მინიჭებული უფლებები და ზუსტად განსაზღვრონ ზღვარი სად მთავრდება დასაქმებულთა ინტერესების დაცვა და იწყება საბოტაჟი ქვეყნის ეკომონიკის წინააღმდეგ. რას ვგულისხმობ: კანონპროექტის განხილვისას ხშირად ხდებოდა აპელირება ევროკავშირის კონვენციებსა და დირექტივებზე. ბატონებო, მოგახსენებთ, რომ ევროპაში გაფიცვები ხელფასების მომატების მიზნით ითვალისწინებს მის ზრდას 2-5%მდე ან სხვა ზომიერ მოთხოვნებს. ჩვენთან კი არსებობს უამრავი მაგალითი გაფიცვებისა, სადაც მოითხოვდნენ ხელფასების ზრდას 50%-ით და ზეგანაკვეთური სამუშაოს ანაზღაურებას 25%-ით, რაც ნებისმიერი საწარმოსთვის შეუსრულებადია და შედეგობრივად საბოტაჟის ტოლფასია.
მივმართავთ საქართველოს მთავრობას, უმრავლესობას, უმცირესობას დაწესდეს მუდმივი მონიტორინგი თუ როგორ იმოქმედებს ახალი კოდექსი ეკონომიკის ზრდის ძირითად მაჩვენებლებზე, სამუშაო ადგილების შექმნაზე. თუ გამოიკვეთა, რომ კოდექსის ამოქმედებამ გააუარესა აღნიშნული მაჩვენებლები და ხელი არ შეუწყო სამუშაო ადგილების შექმნას.
საშემოდგომო სესიაზე დავუბრუნდეთ შრომითი კოდექსის გაუმჯობესების გზების ძიებას და დავდოთ საბოლოო პროდუქტი, რომელიც ჭეშმარიტად ხელს შეუწყობს ეკონომიკის ზრდას, სამუშაო ადილების შექმნას, ბიზნესის განვითარებას.