პარლამენტის აპარატის უფროსმა, გივი მიქანაძემ თბილისის სხვადასხვა უმაღლესი სასწავლებლის სტუდენტებს პარლამენტის სასახლეში უმასპინძლა და მათ დისტანციური სტაჟირების უპრეცედენტო მოდელი გააცნო. პარლამენტის აპარატის უფროსმა ახალგაზრდებს პარლამენტში უკვე დანერგილი, სტრუქტურულ ერთეულებში სტაჟირების გავლის წესზე ინფორმაცია მიაწოდა და იმ სიახლეებზე ისაუბრა, რომელსაც დისტანციური სტაჟირება ითვალისწინებს.

„საქართველოს პარლამენტში წელიწადნახევრის წინ სრულიად ახალი ფორმატის სტაჟირების მექანიზმი დაინერგა, რომლის ანალოგიც არცერთ საჯარო დაწესებულებაში არ არის. ეს არის საკმაოდ სიღრმისეული 6-თვიანი კურსი, რომელიც ახალგაზრდებისთვის იმ თეორიული კურსის პრაქტიკულ და პროფესიულ უნარებში გადატანას ითვალისწინებს, რაც ერთ კონკრეტულ მიმართულებაზეა ორიენტირებული. აღნიშნული სტაჟირების პროგრამის შედეგების გათვალისწინებით, დღის წესრიგში დადგა მისი გაფართოების საკითხი, რომელიც არა მხოლოდ თბილისში მცხოვრებ ახალგაზრდებს, არამედ რეგიონში არსებულ უმაღლესი სასწავლებლის სტუდენტებს და ნებისმიერ დაინტერესებულ საქართველოს მოქალაქეს სტაჟირების პროცესებში ჩართვის საშუალებას მისცემს. სწორედ ამიტომ საქართველოს პარლამენტში დისტანციური სტაჟირების შემოღების იდეა გაჩნდა“, - განაცხადა გივი მიქანაძემ.

პარლამენტის აპარატის უფროსმა ახალგაზრდებს დისტანციური სტაჟირების გავლის წესი და ის პირობები გააცნო, რომლებსაც სტაჟირებაში მონაწილე სუბიექტები უნდა აკმაყოფილებდნენ. მისი ინფორმაციით, პირველ ეტაპზე, პროგრამის პილოტირების პროცესში, დისტანციურ სტაჟირებაში მონაწილეთა რაოდენობა შეზღუდული ოდენობით, რეგიონებისთვის ოთხი, ხოლო თბილისისთვის ორი ადგილით განისაზღვრება და იგი ორ მიმართულებას - ადამიანის რესურსების მართვას და საერთაშორისო ურთიერთობებს მოიცავს. რაც შეეხება დისტანციურ სტაჟირებაში მონაწილეობას, მისი მსურველი შემდეგ მოთხოვნებს უნდა აკმაყოფილებდეს:

• იყოს საქართველოს მოქალაქე;
• სრულყოფილად ფლობდეს ქართულ ენას;
• ფლობდეს საქართველოს აკრედიტირებული უმაღლესი საგანმანათლებლო დაწესებულების ბაკალავრის აკადემიურ ხარისხს, ან უნდა იყოს ბაკალავრიატის არანაკლებ დამამთავრებელი სემესტრის სტუდენტი. 

პარლამენტის აპარატის უფროსმა დისტანციური სტაჟირების გავლის მსურველთა კონკურსის წესებიც განმარტა და აღნიშნა, რომ განაცხადების გადარჩევის შემდეგ, კონკურსანტებისთვის ქართულ ენასა და კომპიუტერულ უნარებში ტესტირება ჩატარდება, ბოლო ეტაპს კი მათთან გასაუბრება წარმოადგენს. მისივე ინფორმაციით, 2020 წლის 8 იანვარიდან 20 იანვრამდე მოხდება განაცხადების მიღება და 10 თებერვლამდე დასრულდება შერჩევის პროცესი.

„დისტანციური სტაჟირების ანალოგი არ არსებობს მსოფლიოს არცერთ პარლამენტში და ჩვენ ვიქნებით პირველი პარლამენტი, სადაც ე.წ. „ონლაინ“ სტაჟირება დაინერგება. შესაბამისად, მნიშვნელოვანია როგორ წარიმართება სტაჟირების საპილოტე პროგრამა, რომლის შედეგებზეც დამოკიდებული იქნება მისი შემდგომი განვითარება და სხვადასხვა მიმართულებების დამატება“, - აღნიშნა გივი მიქანაძემ.
 
დისტანციური სტაჟირების პროგრამის გაცნობის მიზნით, პარლამენტის აპარატის უფროსი გორის და ახალციხის უნივერსიტეტის სტუდენტებს უკვე შეხვდა და იანვრის დასაწყისში ანალოგიური შეხვედრები ქუთაისის, ზუგდიდისა და ბათუმის უმაღლესი სასწავლებლების სტუდენტებისთვისაც გაიმართება.