სპორტისა და ახალგაზრდულ საქმეთა კომიტეტთან არსებული სახელმწიფო ახალგაზრდული პოლიტიკის მონიტორინგის და განვითარების სამუშაო ჯგუფის მეორე შეხვედრა გაიმართა, რომელიც სამუშაო ჯგუფის ხელმძღვანელმა, ირინა ფრუიძემ გახსნა. 

საქართველოს პარლამენტის სპორტისა და ახალგაზრდულ საქმეთა კომიტეტის ინიციატივით მიმდინარე წელს შეიქმნა სამუშაო ჯგუფი, რომელშიც ჩართული არიან პარლამენტის წევრები, აღმასრულებელი ხელისუფლების წარმომადგენლობა, ახალგაზრდული ორგანიზაციები და მოწვეული ექსპერტები.

„სამუშაო ჯგუფის მიზანია ახალგაზრდულ პოლიტიკაზე ერთობლივი მუშაობა, წარსულში განხორციელებული პოლიტიკის შეფასება და სამომავლო ნაბიჯების დაგეგმვა. ამისთვის, პირველ რიგში, უნდა განისაზღვროს ის მიზნები, რომელიც გვაქვს ახალგაზრდობასთან დაკავშირებით, შემდგომ კი შემუშავდეს გეგმა, რომლითაც მივიღებთ გამიზნულ შედეგს. აღნიშნულ პროცესში გვეხმარება ახალგაზრდულ საკითხებზე გაეროს საკოორდინაციო ჯგუფი და ექსპერტები, რისთვისაც დიდ მადლობას ვუხდით მათ“, - განაცხადა ირინა ფრუიძემ.

პირველ სამუშაო შეხვედრაზე დამსწრეთ სამომავლო გეგმებზე ისაუბრეს. მას შემდეგ ჩატარდა სამუშაოები, რომლის მიხედვითაც შეფასდა ქვეყნის ახალგაზრდული პოლიტიკა და სამოქმედო გეგმა.

დღევანდელ შეხვედრაზე ექსპერტმა ნინა გოგოლაძემ დამსწრეთ წარუდგინა პრეზენტაცია, რომელიც აერთიანებდა ახალგაზრდული პოლიტიკის სფეროში ევროკავშირის წევრი ქვეყნების კარგი პრაქტიკის შესახებ შედარებით ანალიზს, ახალგაზრდული პოლიტიკის მართვისა და კოორდინაციის შესახებ არსებულ რეკომენდაციებსა და საქართველოს ახალგაზრდული პოლიტიკის სამოქმედო გეგმის განხორციელების სტატუსის შეფასებას.

შეხვედრაზე ყურადღება გამახვილდა ახალგაზრდულ საკითხებზე გაეროს საკოორდინაციო ჯგუფის როლზე ახალგაზრდული პოლიტიკის შემუშავებაში.

„ჩვენ წლებია ახალგაზრდული განვითარების საკითხებზე ვმუშაობთ, გამომდინარე იქიდან, რომ სხვადასხვა გამოწვევების წინაშე ვდგავართ, როგორც გლობალურ დონეზე, ასევე ადგილობრივ დონეზე, გახდა საჭირო ახალგაზრდული პოლიტიკის კონცეფციის, ახალი გამოწვევების მიხედვით ხელახლა შემუშავება. ეს პროცესი არის ძალიან ღია, მხარს ვუჭერთ იმას, რომ ყველა ჩართული იყოს და ერთობლივად მოხდეს ისეთი პოლიტიკის შემუშავება, რომელიც უპასუხებს ახალგაზრდების წინაშე არსებულ საერთო საჭიროებებს“, - აღნიშნა გაეროს მოსახლეობის ფონდის ანალიტიკოსმა, ნატალია ზაქარეიშვილმა.

პრიორიტეტებსა და სამომავლო გეგმებზე ისაუბრა სსიპ ახალგაზრდობის სააგენტოს ხელმძღვანელმა, რეზო ჩარკვიანმა. მისი თქმით, ახალგაზრდულ სფეროში ფუნდამენტური რეფორმაა გასატარებელი, ამ მხრივ კი ერთ-ერთი მთავარი გამოწვევა ეკოსისტემის შექმნაა. „ვერცერთი სფერო, იქნება ეს სამეწარმეო, კრეატიული, ლოგისტიკური თუ სხვა, ეკოსისტემის გარეშე ვერ იარსებებს“, - აღნიშნა მან.

შეხვედრის ფარგლებში სამუშაო ჯგუფის წევრებმა მიმოიხილეს კონცეფციის შემუშავების მეთოდოლოგიები და თემასთან დაკავშირებული სხვა საკითხები.

შეხვედრა შეაჯამა სამუშაო ჯგუფის ხელმძღვანელმა ირინა ფრუიძემ: „ვიმსჯელეთ რეკომენდაციებზე, რომელიც მოამზადეს ექსპერტებმა იმის შესახებ, თუ როგორი უნდა იყოს მომავალში ახალგაზრდული პოლიტიკის კოორდინაციის მექანიზმები და მომავალი სამოქმედო გეგმა. ვიწყებთ ფართო საჯარო განხილვებს, იმისთვის, რომ შევიმუშაოთ ახალგაზრდული პოლიტიკის ერთიანი სახელმწიფო კონცეფცია. ამ განხილვებში ჩართული იქნება ყველა რეგიონის ახალგაზრდობა და ამის შედეგად სამუშაო ჯგუფის ფორმატში ჩამოვაყალიბებთ დოკუმენტს, რომელიც საბოლოო ჯამში პარლამენტმა უნდა დაამტკიცოს“.