საქართველოს პარლამენტის აპარატის უფროსი, გივი მიქანაძე, საქართველოში ოფიციალური ვიზიტად მყოფი, შვეიცარიის კონფედერაციის პარლამენტის თავმჯდომარის თანმხლები დელეგაციის წევრს, შვეიცარიის პარლამენტის აპარატის უფროსს, ფილიპ შვაბს შეხვდა.

შეხვედრაზე მხარეებმა ორი ქვეყნის პარლამენტის ადმინისტრაციებს შორის თანამშრომლობის სამომავლო პერსპექტივები და ერთობლივი პროექტების განხორციელების შესაძლებლობები განიხილეს.

შეხვედრაზე აღნიშნა, რომ შვეიცარიის თანამშრომლობისა და განვითარების სააგენტო (SDC) 2021-2024 წლების საქართველოს განვითარების მხარდამჭერ პროგრამაზე მუშაობს და პროგრამის პრიორიტეტების განსაზღვრის და ცალკეული მიმართულებების გამოკვეთის შემდეგ, შესაძლოა გარკვეული პროექტები საქართველოს პარლამენტის მხარდაჭერის მიმართულებებითაც განხორციელდეს, რაც თავის მხრივ, საქართველოს და შვეიცარიის პარლამენტებს შორის თანამშრომლობის გაღრმავებას შეუწყობს ხელს. 

სტუმარმა, რომელიც შვეიცარიის პარლამენტის ადმინისტრაციის ხელმძღვანელობის პარალელურად, პარლამენტების გენერალური მდივნების ასოციაციის (ASGP) პრეზიდენტიც არის, ასოციაციის ფარგლებში საქართველოს პარლამენტის აპარატის უფროსის აქტივობებს მიესალმა და სამომავლო საქმიანობაში წარმატებები უსურვა.

პარლამენტის აპარატის უფროსმა შვეიცარიელ კოლეგას საქართველოში სტუმრობისთვის მადლობა გადაუხადა და ორი ქვეყნის პარლამენტების ადმინისტრაციებს შორის თანამშრომლობის გაღრმავების მზაობა და მხარდაჭერა გამოთქვა.

შეხვედრას შვეიცარიის თანამშრომლობისა და განვითარების სააგენტოს სამხრეთ-კავკასიის რეგიონალური დირექტორი, დენიელე მეუვლი მონტელეონე დაესწრო.