საგარეო ურთიერთობათა კომიტეტის დეზინფორმაციის და პროპაგანდის საკითხებზე მომუშავე თემატური მოკვლევის ჯგუფმა, ადგილობრივი ორგანიზაციებისგან დასაბუთებული მოსაზრებების მიღება დაასრულა.

საწყის ეტაპზე, მოკვლევის ჯგუფთან თანამშრომლობის სურვილი 30-მა ორგანიზაციამ დაადასტურა, საკითხზე დასაბუთებული წერილობითი მოსაზრებები 16- მა ორგანიზაციამ წარმოადგინა.

„მოცულობითი ინფორმაცია მივიღეთ, როგორც ადგილობრივი ასევე, საერთაშორისო ორგანიზაციებისგან. ამ დასაბუთებული და მტკიცებულებებზე დაფუძნებული მოსაზრებების გათვალისწინებით ასევე, აღმასრულებელი უწყებებიდან მიღებული ინფორმაციის საფუძველზე, გამოვკვეთავთ იმ ძირითად საფრთხეებს, რომელიც საქართველოში დეზინფორმაციის და პროპაგანდის გავრცელებას უკავშირდება. ვიმსჯელებთ, კიდევ რა ღონისძიებებია გასატარებელი, როგორც საკანონმდებლო ასევ,ე აღმასრულებელი ხელისუფლების დონეზე დეზინფორმაციის და პროპაგანდის ზემოქმედების საფრთხეების შესამცირებლად“, - განაცხადა ნინო გოგუაძემ.

მოკვლევის ჯგუფი, საჭიროების შემთხვევაში, გამართავს ზეპირ მოსმენებს იმ ადგილობრივი ორგანიზაციების წარმომადგენლების მონაწილეობით, რომლებმაც, დასაბუთებული მოსაზრებები წარმოადგინეს. მოკვლევის პროცესში, ასევე მოუსმენენ აღმასრულებელი უწყებების წარმომადგენლებს.

მოკვლევის პროცესის ბოლოს, ჯგუფი შეიმუშავებს დასკვნას და რეკომენდაციების პროექტს საგარეო ურთიერთობათა კომიტეტისთვის წარსადგენად.

დასაბუთებული მოსაზრებები წარმოადგინეს შემდეგმა ორგანიზაციებმა: CIPDD - მშვიდობის, დემოკრატიის და განვითარების კავკასიური ინსტიტუტი; IDFI - ინფორმაციის თავისუფლების განვითარების ინსტიტუტი; GFSIS - საქართველოს სტრატეგიისა და საერთაშორისო ურთიერთობების კვლევის ფონდი - რონდელის ფონდი; საქართველოს ჟურნალისტური ეთიკის ქარტია; NDI - ეროვნული დეკორატიული ინსტიტუტი; CRRC – კავკასიის კვლევითი რესურსების ცენტრი; GRASS - საქართველოს რეფორმების ასოციაცია; TI - საერთაშორისო გამჭვირვალობა ; MDF- მედიის განვითარების ფონდი; GSAC - საქართველოს სტრატეგიული ანალიზის ცენტრი; საქართველოს მდგრადი განვითარების ასოციაცია; თბილისის ლიბერალური აკადემია ; ტაბულა; მედია კლუბი, საია- ახალგაზრდა იურისტთა ასოციაცია, IRI- საერთაშორისო რესპუბლიკური ინსტიტუტი.

თემატური მოკვლევის ჯგუფის მუშაობისა და მიღებული მასალების შესახებ სრული ინფორმაცია შეგიძლიათ იხილოთ პარლამენტის ვებგვერდზე >>>