2017 წლის 1 დეკემბერს თბილისში, ხორავას ქუჩაზე მომხდარი დანაშაულის შედეგად ორი ახალგაზრდის  მკვლელობის ფაქტის შემსწავლელი საქართველოს პარლამენტის დროებითი საგამოძიებო კომისიის თავმჯდომარე სერგი კაპანაძემ, ჟურნალისტებისთვის გამართულ ბრიფინგზე, კომისიის დღევანდელი სხდომა შეაჯამა, რომელზეც შინაგან საქმეთა სამინისტროს და პროკურატურის წარმომადგენლები გამოიკითხა.

„დისკუსიის, დასმული კითხვების და მათზე მიღებული პასუხების შედეგად, გამოიკვეთა ორი მნიშვნელოვანი საკითხი. მე ვაპირებ, რომ ამ ორ საკითხთან დაკავშირებით, მე ხვალ კომისიის ხდომაზე დავაყენო საკითხი, რომ კომისიამ იმსჯელოს და შეიმუშაოს რეკომენდაციები შესაბამისი სამართალდამცავი ორგანოების მიმართ.

საქმის მასალებიდან, დღევანდელი დისკუსიიდან გამომდინარე, დღეს მიღებული ახსნა-განმარტებებიდან გამომდინარე, გამოიკვეთა საკმარისი რაოდენობა გარემობებებისა, რომელიც მიუთითებს, რომ საქმის ერთერთი ფიგურანტი მ.კ.-ს მიმართ, შესაძლოა, დაწყებული იყოს სისხლის სამართლებრივი დევნა დავით სარალიძის ჯგუფურ მკვლელობაში თანამონაწილეობის კუთხით. ეს ინფორმაცია საქმიდან ჩანს, რომ ხელმისაწვდომი იყო პროკურატურისთვის და შსს-სთვის დასაწყისიდანვე გამოძიების, მაგრამ ეს ნაბიჯი მათ არ გადაუდგიათ.

მეორე მნიშვნელოვანი საკითხი, რომელიც გამოიკვეთა, არის ის, რომ ხორავას ქუჩაზე მომხდარი კონფლიქტის დროს დაჭრილი იქნა ერთი მოზარდი გ.მ. რომლის შესახებ ინფორმაცია ასევე ხელმისაწვდომი იყო პირველი დღეებიდანვე შსს-სთვის და პროკურატურისთვის. მიუხედავა ამისა, არც ამ საქმის ცალკე გამოყოფა არ მომხდარა, თუმცა, ამას კანონი ავალდებულებდა შესაბამის სამართალდამცავ ორგანოებს და ასევე, არ მომხდარა ამ საქმის ირგვლივ კონკრეტული გამოძიების წარმოება. შესაბამისად, ჩემი რეკომენდაცია ასევე კომისიის მიმართ იქნება, რომ ეს საკითხიც იყოს განხილული და ამ ორ თემაზე იყოს შემუშავებული რეკომენდაციები“, - განაცხადა სერგი კაპანაძემ.