საგარეო ურთიერთობათა კომიტეტის თავმჯდომარე, სოფიო ქაცარავა და კომიტეტის წევრი ირაკლი მეზურნიშვილი, საქართველოს საპატრიარქოს წმინდა ანდრია პირველწოდებულის სახელობის ქართული უნივერსიტეტის სტუდენტებს შეხვდნენ.

შეხვედრაზე, საქართველოს გაცხადებულ საგარეო კურსზე, პოლიტიკურ პრიორიტეტებზე, ევროპული სივრცისკენ საქართველოს სწრაფვაზე და ამ მიმართულებით ქვეყნის მიერ განვლილ გზაზე ისაუბრეს.

„ჩვენ გვაქვს ძალიან მკაფიოდ გაცხადებული და ჩამოყალიბებული საგარეო კურსი, რომელსაც ევროპული და ევროატლანტიკური კურსი ჰქვია“, - განაცხადა საგარეო ურთიერთობათა კომიტეტის თავმჯდომარემ, სოფიო ქაცარავამ. მან იმ სიკეთეებზე გაამახვილა ყურადღება, რომელიც საქართველომ ევროპულ სტრუქტურებთან ინტეგრაციის შედეგად უნდა მიიღოს. ასევე, მიმოიხილა ევროკავშირში საქართველოს გაწევრიანებისთვის ჩვენი ქვეყნის წინაშე მდგარი გამოწვევები.

სოფიო ქაცარავამ სტუდენტებთან შეხვედრისას ქვეყანაში უკვე განხორციელებულ და ჯერ კიდევ მიმდინარე რეფორმებზე ისაუბრა. ყურადღება გაამახვილა დემოკრატიული ინსტიტუტების გაძლიერების კუთხით მიმდინარე პროცესებზე. ასევე საუბარი შეეხო ვიზის ლიბერალიზაციის თვალსაზრისით მიღწეულ წარმატებას და ამ წარმატების მიღწევისთვის ხელისუფლების მიერ განხორციელებულ რეფორმებს.

სოფიო ქაცარავამ ყურადღება გაამახვილა იმ შესაძლებლობებზე, რომელსაც უვიზო მიმოსვლის ამოქმედება იძლევა. კომიტეტის თავმჯდომარემ განათლებასა და განათლებული ახალგაზრდების მნიშვნელობაზე ისაუბრა. მან ყურადღება გაამახვილა იმ პროგრამებსა თუ პროექტებზე, რომლის ფარგლებშიც ჩვენი ქვეყნის მოქალაქეებს სწავლის გაგრძელების შესაძლებლობა აქვთ.

„ვიზის ლიბერალიზაციამ ძალიან დიდი სტიმული და მოტივაცია მოგვცა იმისთვის, რომ ბევრი გავაკეთოთ ამ სივრცეში ინტეგრაციისთვის. ახალგაზრდებს დიდი შესაძლებლობები გეძლევათ იმისთვის, რომ სწავლა სხვადასხვა ქვეყანაში განაგრძოთ“, - განაცხადა სოფიო ქაცარავამ.

შეხვედრაზე, ირაკლი მეზურნიშვილმა ევროკავშირთან ეკონომიკური ინტეგრაციის მნიშვნელობაზე ისაუბრა. მისი თქმით, ერთ-ერთი ძირითადი პრიორიტეტი ქვეყანაში ეკონომიკური ვითარების გაუმჯობესებაა. „ჩვენ ძალიან ბევრს ვაკეთებს იმისთვის, რომ სტანდარტები გაიზარდოს ისეთ დონეზე, რათა ჩვენი პროდუქცია ევროკავშირის ბაზარზე ინტენსიურად გავიდეს. ევროკავშირთან საქართველოს ეკონომიკური ინტეგრაცია ძალიან მნიშვნელოვანია“, - განაცხადა ირაკლი მეზურნიშვილმა. მან ყურადღება გაამახვილა ღრმა და ყოვლისმომცველი თავისუფალი სავაჭრო სივრცის შესახებ და საქართველოს ევროკავშირთან ასოცირების შესახებ შეთანხმებებზე. მისი თქმით, ევროკავშირის გარდა, საქართველოს თავისუფალი ვაჭრობის ხელშეკრულება გაფორმებული აქვს ჩინეთთან და ახლა მიდის ინტენსიური მოლაპარაკებები ამერიკის შეერთებულ შტატებთან.

დეპუტატებმა საქართველო-რუსეთსა და საქართველოს ხელისუფლების ამერიკის შეერთებულ შტატებთან ურთიერთობაზეც ისაუბრეს. ყურადღება გამახვილდა 2017 წლის აშშ-ის ბიუჯეტის კანონის იმ პუნქტზე, სადაც საქართველოს ტერიტორიების ოკუპაციის შესახებ ჩანაწერი პირველად გაკეთდა. როგორც აღინიშნა, ხსენებული კანონის თანახმად, დაფინანსებით ვერ ისარგებლებს ვერცერთი ქვეყანა რომელიც რუსეთის მიერ ოკუპირებული აფხაზეთისა და ცხინვალის რეგიონის/სამხრეთ ოსეთის დამოუკიდებლობას აღიარებს, ან მათთან დიპლომატიური ურთიერთობებს დაამყარებს.

შეხვედრა კითხვა-პასუხის რეჟიმში გაგრძელდა. სტუდენტების კითხვები ძირითადად საქართველოს საგარეო პოლიტიკას და ჩვენი ქვეყნის წინაშე არსებულ გამოწვევებს ეხებოდა.

საგარეო ურთიერთობათა კომიტეტის თავმჯდომარემ, სოფიო ქაცარავამ მადლობა გადაუხადა ახალგაზრდებს პარლამენტში მოსვლის და დეპუტატებთან შეხვედრის სურვილისთვის. „მნიშვნელოვანია ასეთი შეხვედრების ხშირად გამართვა ჩვენი ქვეყნის მოქალაქეებთან, განსაკუთრებით კი, მომავალ თაობასთან. ჩვენი საქმიანობის, ქვეყნის მიერ არჩეული კურსის, მიღწევებისა და გამოწვევების უკეთ გაცნობის მიზნით, ჩვენ ინტენსიურად ვმართავთ შეხვედრებს სხვადასხვა უნივერსიტეტის სტუდენტებთან არა მარტო თბილისის მასშტაბით, არამედ რეგიონებშიც“, - განაცხადა სოფიო ქაცარავამ.

კომიტეტის თავმჯდომარემ, 20 ივნისს საქართველოში 57 ქვეყანასთან დიპლომატიური ურთიერთობის დაარსების 25 წლისთავთან დაკავშირებით, ანდრია პირველწოდებულის სახელობის ქართული უნივერსიტეტის სტუდენტები პარლამენტში მოიწვია.