პარლამენტის წევრი, გია ჟორჟოლიანი მიიჩნევს, რომ პრემიერ-მინისტრის ინიციატივა, რომელიც კემბრიჯის და ლონდონის ეკონომიკური პოლიტიკის პროფესორებთან კონსულტაციების დაწყებას გულისხმობს, ძალიან მნიშვნელოვანია და იგი პოლიტიკურ მხარდაჭერას საჭიროებს.

„როგორც ცნობილია გუშინ პრემიერ-მინისტრმა, გიორგი გახარიამ ვიდეო კონფერენცია გამართა კემბრიჯისა და ლონდონის უნივერსტეტების ეკონომიკური პოლიტიკის პროფესორებთან - ჰა ჯუნ ჩანგთან, კრისტოფერ კრამერთან და ჯონათან დი ჯონსთან. 

ფართო საზოგადეობისთვის საინტერესო იქნება განვმარტოთ ამ ადამიანების შეხედულებები, რომლებიც განვითარების ეკონომიკის (დეველოპმენტალიზმის) სკოლის წარმომადგენლები არიან და რადიკალურად ეწინააღმდეგებიან ნეოლიბერალურ შეხედულებებს, რომელიც ბოლო 30 წელი საქართველოშია გაბატონებული და რომლის მიხედვითაც მიმდინარეობს ჩვენი ეკონომიკური და სოციალური ცხოვრება. ეს ადამიანები თავის სფეროში უმაღლესი რანგის წარმომადგენლები და არაერთი მნიშვნელოვანი კვლევის და ანგარიშების ავტორებს წარმოადგენენ.

ძალიან სასიხარულო და მისასალმებელია, რომ ამ მიმართულების ექსპერტები პოსტსაბჭოთა საქართველოში პირველად გახდებიან ჩვენი მთავრობის მრჩევლები და მთავრობა მათთან ერთად იმუშავებს პოსტკრიზისულ ეკონომიკის განვითარების გეგმაზე. ეს გულისხმობს აქტიურ სახელმწიფო პოლიტიკას, პრიორიტეტების წარმოჩენას, გეგმების შედგენას და ასე შემდეგ. პრემიერის ეს წამოწყება მნიშვნელოვანია და საჭიროებს პოლიტიკურ მხარდაჭერას, ჩვენგან კი ეს მხარდაჭერა ნამდვილად ექნება“, - განაცხადა გია ჟორჟოლიანმა დღეს გამართულ ბრიფინგზე.