„ფრაქცია „ერთიანი ნაციონალური მოძრაობის“ ინიციატივით დღეს, პარლამენტში დარეგისტრირდა დადგენილების პროექტი, რომელიც 20 ივნისს განვითარებული მოვლენების შეფასებას შეეხება“, - განაცხადა ფრაქცია „ნაციონალური მოძრაობის“ თავმჯდომარის მოადგილემ, სალომე სამადაშვილმა დღეს გამართულ ბრიფინგზე.

მისივე თქმით, დადგენილების პროექტით, საგარეო საქმეთა სამინისტროს ევალება მოამზადოს იმ რუსი პოლიტიკოსების სია, რომელთა ვიზიტი საქართველოში შეიძლება ჩაითვალოს არამიზანშეწონილად.

„ჩვენ შესაბამისი დადგენილების პროექტით მივმართავთ საქართველოს პარლამენტს, რომ 20 ივნისს სერგეი გავრილოვის თავმჯდომარეობით საქართველოს პარლამენტში ჩატარებული სხდომა შეფასდეს როგორც სახელმწიფო ინტერესების წინააღმდეგ მიმართული აქტი. დადგენილების პროექტის თანახმად, უნდა დადგინდეს იმ პირთა წრე ვინც მოიწვია სერგეი გავრილოვი საქართველოში, უზრუნველყო მის მიერ სხდომის ჩატარება, ასევე, უნდა განისაზღვროს იმ პირთა წრე, ვინც არიან პირდაპირ პასუხისმგებელი 20 - 21 ივნისის ღამის ძალადობაზე და იმ პირთა წრეც, ვინც საკუთარი პოლიტიკური გადაწყვეტილებებით ხელი შეუწყო რუსული ინტერესების გატარებას. ჩვენ ვხედავთ რუსეთის განცხადებას, რომ 20 - 21 ივნისის მოვლენები უკავშირდება ოპოზიციის მხრიდან მცდელობას ქვეყანაში მომხდარიყო არეულობა და ქართველი პოლიტიკოსები საკუთარი გადაწყვეტილებით ამას ხელს უწყობენ. ყველა ეს პირი შეყვანილი უნდა იყოს შესაბამისად გავრილოვის სიაში. ჩვენ მივმართავთ ადამიანის უფლებების დაცვისა და სამოქალაქო ინტეგრაციის კომიტეტს და იურიდიულ საკითხთა კომიტეტს დაადგინოს ამ პირთა წრე და შემდგომ შემუშავდეს იმ სანქციების ჩამონათვალი, რომელთა მიღებაც მიზანშეწონილი იქნება საერთაშორისო თანამეგობრობის მხრიდან ამ პირთა წრის მიმართ. შესაბამისად, ეს სია, ისევე როგორც შესაძლო სანქციები, წარდგენილ იქნას განსახილველად საქართველოს პარლამენტში ორი თვის ვადაში. ეს დადგენილება დღეს დარეგისტრირდა და უახლოეს პლენარულ სესიაზე ჩვენ მოვითხოვთ მის დღის წესრიგში შეტანას და ოფიციალური განხილვების დაწყებას“, - განაცხადა სალომე სამადაშვილმა.