2017 წლის 1 დეკემბერს თბილისში, ხორავას ქუჩაზე მომხდარი დანაშაულის შედეგად ორი ახალგაზრდის მკვლელობის ფაქტის შემსწავლელმა პარლამენტის დროებითმა საგამოძიებო კომისიამ, დღევანდელ სხდომაზე, შინაგან საქმეთა მინისტრის გიორგი გახარიას, იუსტიციის მინისტრის თეა წულუკიანის და ყოფილი მთავარი პროკურორის, ირაკლი შოთაძის ოფიციალური ახსნა-განმარტებები მოისმინა.

შინაგან საქმეთა მინისტრმა და ყოფილმა მთავარმა პროკურორმა ხორავას ქუჩაზე მომხდარ დანაშაულთან დაკავშირებით ჩატარებულ საგამოძიებო და საპროცესო მოქმედებებზე კომისიის წევრების კითხვებს უპასუხეს.

„ეს არის საპარლამენტო რესპუბლიკა, სადაც საპარლამენტო კონტროლს აქვს უმნიშვნელოვანესი ფაქტორი პოლიტიკურ პროცესში და ამიტომ ვიმყოფებით აქ. რა თქმა უნდა, გვესმის, რომ ეს არის ორმხრივი პასუხისმგებლობა. რა თქმა უნდა, კარგად გვესმის, რომ ეს კომისია შეიქმნა სწორედ იმიტომ, რომ თუ გამოძიების პირობებში რომელიმე ეტაპზე იყო რაიმე სახის ხარვეზი ან დანაშაული ჩადენილი, ეს ქმედება იყოს გამოვლენილი. ჩვენი მხრიდან სრულ პასუხისმგებლობას ვიღებთ იმაზე, რომ თუ გარკვეული ქმედებებიდან გამომდინარე იქნება მიზან-შედეგობრივი კავშირი დადგენილი, რომელმაც საბოლოო შედეგზე იმოქმედა, იქნება ეს ხარვეზი თუ დანაშაული, ჩვენ შესაბამისი, აბსოლუტურად ადეკვატური რეაგირება გვექნება“, - განაცხადა შინაგან საქმეთა მინისტრმა, გიორგი გახარიამ.

შინაგან საქმეთა მინისტრის, იუსტიციის მინისტრისა და ყოფილი მთავარი პროკურორის ოფიციალური ახსნა-განმარტებების მოსმენის შემდეგ, დროებითმა საგამოძიებო კომისიამ საორგანიზაციო საკითხები განიხილა.

როგორც დროებითი საგამოძიებო კომისიის თავმჯდომარემ, სერგი კაპანაძემ განაცხადა, ამ ეტაპზე კომისიის სხდომები დასრულებულია და სავარაუდოდ, აგვისტოს ბოლოს კომისიის რამდენიმე სხდომა ჩატარდება. მისივე თქმით, ხვალ რამდენიმე არასრულწლოვანი გამოიკითხება, ხოლო ორშაბათს კომისიის წევრები სასჯელაღსრულების დაწესებულებაში ორ პიროვნებას გამოკითხავენ.

„გამოკითხვების და მტკიცებულებების შეგროვების ნაწილს, ამ ეტაპზე, შემდეგი კვირის სამშაბათ - ოთხშაბათისთვის დავასრულებთ და მომდევნო დღიდან დავიწყებთ მუშაობას მოხსენების ვარიანტზე, რომელიც მზად იქნება მაქსიმუმ ორი კვირის განმავლობაში. აგვისტოს შუა რიცხვებიდან გვექნება საშუალება, რომ მოხსენების პირველი ვერსია ვნახოთ და აგვისტოს ბოლომდე შევთანხმდეთ ამ კონკრეტულ ვერსიაზე, რომელსაც სექტემბრის დასაწყისში წარვადგენთ პირველივე ბიუროს სხდომაზე“, - განაცხადა სერგი კაპანაძემ.