გივი მიქანაძე ნორვეგიის სამეფოს ელჩს შეხვდა
პარლამენტის აპარატის უფროსმა, გივი მიქანაძემ ნორვეგიის სამეფოს ელჩთან, ჰელენა სანდ ანდრესენთან გაცნობითი ხასიათის შეხვედრა გამართა.
შეხვედრაზე აპარატის უფროსმა ნორვეგიელ დიპლომატს პარლამენტის ადმინისტრაციაში განხორციელებულ და მიმდინარე რეფორმებზე ინფორმაცია მიაწოდა და აპარატის საქმიანობის ძირითად პრიორიტეტებზე ისაუბრა.
გივი მიქანაძემ ელჩს შშმ პირებისთვის პარლამენტის შენობის ხელმისაწვდომობის კუთხით გატარებული სამუშაოები გააცნო და პარლამენტის სასწავლო ცენტრის ახალ ფუნქციებზე, მოქალაქეთა ჩართულობის ცენტრსა და დისტანციური სტაჟირების საპილოტე პროგრამის მნიშვნელობაზე ისაუბრა.
შეხვედრაზე საუბრის ერთ-ერთ თემას ელექტრონული სწავლების (E-Learning) პროგრამის საკითხი წარმოადგენდა.
აღინიშნა, რომ ნორვეგიის სამეფოში ელექტრონული სწავლების პროგრამა სამთავრობო უწყებებში წარმატებულად ხორციელდება და ამ კუთხით, გივი მიქანაძემ ნორვეგიელ დიპლომატს მისი ქვეყნის გამოცდილების გაზიარებაში მხარდაჭერა და ხელშეწყობა სთხოვა.
როგორც პარლამენტის აპარატის უფროსმა აღნიშნა, ელექტრონული სწავლების პლატფორმა საქართველოს პარლამენტის ადმინისტრაციაში ცოტა ხნის წინ დაინერგა და იგი ახლა განვითარების პროცესშია, შესაბამისად, ისეთი ქვეყნის გამოცდილების გაცნობა, როგორსაც ნორვეგია წარმოადგენს, ქართული მხარისთვის მნიშვნელოვანი და საინტერესოა.
შეხვედრაზე მხარეებმა ორი ქვეყნის პარლამენტის ადმინისტრაციებს შორის თანამშრომლობის და ურთიერთობების გააქტიურების შესაძლებლობები მიმოიხილეს.
გივი მიქანაძემ ჰელენა სანდ ანდრესენს საქართველოს პარლამენტის აპარატის თანამშრომლებისთვის ნორვეგიის საკანონმდებლო ორგანოს ადმინისტრაციაში სტაჟირების გავლის ინიციატივა გააცნო და აღნიშნულ საკითხზე ნორვეგიელ კოლეგასთან კომუნიკაციების დამყარების წინადადებით მიმართა.
ნორვეგიის სამეფოს ელჩმა პარლამენტის აპარატის უფროსთან გამართული შეხვედრა საინტერესოდ შეაფასა და გივი მიქანაძეს შეხვედრის ფარგლებში განხილულ საკითხებზე დახმარება და თანამშრომლობა აღუთქვა.
