გივი მიქანაძე სტუდენტური პარლამენტის წევრებს შეხვდა
საქართველოს პარლამენტის აპარატის უფროსი, გივი მიქანაძე სტუდენტური პარლამენტის წევრებს შეხვდა.
პარლამენტის აპარატის უფროსი სტუდენტებს იმ საკანონმდებლო ცვლილებებზე ესაუბრა, რომელიც პარლამენტში კონსტიტუციისა და რეგლამენტის ახალი რედაქციის ფარგლებში განხორციელდა.
გივი მიქანაძემ განსაკუთრებული ყურადღება პარლამენტის აპარატში მიმდინარე და დაგეგმილი რეფორმირების პროცესზე და პარლამენტის კვლევითი და სასწავლო ცენტრების გაძლიერების მიმართულებით განსახორციელებელ ღონისძიებებზე გაამახვილა და პარლამენტის საგამომცემლო სახლის, თანამშრომელთა საზღვარგარეთ სტაჟირების, მობილური აპლიკაციის და დისტანციური სწავლების პორტალის შესახებ ისაუბრა.
პარლამენტის აპარატის უფროსი სტუდენტებს სტაჟირების განახლებულ პროგრამაზე და იმ შესაძლებლობებზე ესაუბრა, რომელსაც საკანონმდებლო ორგანოში სტაჟირების პროგრამა სთავაზობს ახალგაზრდებს.
მან ახალგაზრდებს დეტალური ინფორმაცია მიაწოდა ყველა იმ ეტაპზე, რომლის გავლაც უწევთ სტაჟიორებს საკუთარი ცოდნისა და უნარების ასამაღლებლად.
საკანონმდებლო ორგანოს აპარატის ხელმძღვანელმა, სტუდენტებს ასევე მიაწოდა ინფორმაცია ახალი კონცეფციის-დისტანციური სტაჟირების შესახებ.
მისი თქმით, კონცეფციაზე მუშაობა პრაქტიკულად დასრულებულია, პრეზენტაცია თებერვლის თვეში გაიმართება და ახალგაზრდებს შესაძლებლობას მისცემს ონლაინ - პლატფორმის მეშვეობით სრულყოფილად შეძლონ სტაჟირების პროგრამის ათვისება.
გივი მიქანაძემ ახალგაზრდების შეკითხვებს უპასუხა. პარლამენტის აპარატის უფროსმა სტუდენტებს წარმატებები უსურვა და იმედი გამოთქვა, რომ ისინი დაინტერესდებიან პარლამენტის შეთავაზებებით და საკანონმდებლო საქმიანობაში აქტიურად იქნებიან ჩართულნი.
