სპორტისა და ახალგაზრდულ საქმეთა კომიტეტის თავმჯდომარემ მიხეილ ყაველაშვილმა ისრაელის სახელწიფოს საგანგებო და სრულუფლებიან ელჩთან, რან გიდორთან გაცნობითი ხასიათის შეხვედრა გამართა. 

მხარეებმა ორმხრივი თანამშრომლობის საკითხებზე და ამ კუთხით არსებულ პერსპექტივებზე ისაუბრეს.

კომიტეტის თავმჯდომარემ დიპლომატს კომიტეტის საქმიანობა გააცნო. მიხეილ ყაველაშვილი რან გიდორს კომიტეტის ფარგლებში განხორციელებული საკანონმდებლო საქმიანობის და გატარებული და დაგეგმილი რეფორმების ძირითად მიმართულებებზე ესაუბრა.

„ელჩს გავაცანი კომიტეტის სტრატეგია და ჩვენს მიერ შემუშავებული სამწლიანი სამოქმედო გეგმა. ვისაუბრეთ მნიშნელოვან ინიციატივებზე და მიმართულებებზე, რომელსაც კომიტეტი ახორციელებს. მათ შორის, სპორტის კანონზე, რომელზე მუშაობაც დასრულების ფაზაშია. ჩვენ დაწყებული გვაქვს მასობრივი სპორტის სტრატეგიაზე მუშაობა, ასევე ახალგაზრდობის მიმართულებით საკმაოდ ნაყოფიერი სამუშაო გავწიეთ და დავამტკიცეთ ახალგაზრდობის პოლიტიკის კონცეფცია. ელჩი აღნიშნული საკითხებით დაინტერესდა“, - განაცხადა მიხეილ ყაველაშვილმა.

მხარეებმა შეხვედრაზე ხაზი გაუსვეს ორ ქვეყანას შორის არსებულ ურთიერთობას და კომიტეტის ფარგლებში სამომავლო თანამშრომლობის შესახებ იმსჯელეს. მისივე თქმით, შეხვედრაზე ყურადღება გამახვილდა სპორტული ტურიზმის მიმართულებით არსებულ თანამშრომლობაზე.

მიხეილ ყაველაშვილის შეფასებით ისრაელის სახელწიფოს საგანგებო და სრულუფლებიან ელჩთან ძალიან პოზიტიური შეხვედრა გაიმართა, სადაც მხარეებმა მათთვის მნიშვნელოვან საკითხებთან დაკავშირებით ინფორმაციები გაცვალეს და სამომავლო თანამშრომლობაზე შეთანხმდნენ. 

„საინტერესო შეხვედრა გვქონდა. დარწმუნებული ვარ ჩვენი თანამშრომლობა გაგრძელდება, ვინაიდან ძალიან მნიშვნელოვანია როგორც ჯანსაღი ცხოვრება და სპორტი, ასევე ახალგაზრდობის განვითარება ჩვენს ქვეყანაში და ელჩმა სურვილი გამოთქვა, რომ ჩაერთოს ამ პროცესებში“, - განაცხადა მიხეილ ყაველაშვილმა.