დარგობრივი ეკონომიკისა და ეკონომიკური პოლიტიკის თავმჯდომარის პირველმა მოადგილემ, პაატა კვიჟინაძემ პარლამენტის აპარატის სტაჟიორებთან შეხვედრა გამართა.

ძირითადი საკითხები, რომლის შესახებაც პარლამენტის წევრმა სტაჟიორებთან შეხვედრისას ისაუბრა, შეეხებოდა როგორც საკანონმდებლო საქმიანობას, ისე ქვეყანაში არსებულ აქტუალურ თემატიკას, როგორიცაა საბაზრო ეკონომიკური და სოციალურ-ეკონომიკური მდგომარეობა, ასევე სოფლის მეურნეობასთან და სურსათის უვნებლობასთან დაკავშირებული საკითხები.

პაატა კვიჟინაძემ თავისუფალი სავაჭრო სივრცის განვითრების კუთხით ევროპასთან ასოცირების ხელშეკრულების მნიშვნელობას გაუსვა ხაზი და აღნიშნა, რომ საქართველოს ხელისუფლების ერთ-ერთი ძირითადი ამოცანაა, ევროპის ბაზარზე ეტაპობრივად შევიდეს. მისივე განცხადებით, მნიშვნელოვანია, რომ საქართველოში დღეს არსებული კანონმდებლობა ჰარმონიაში იყოს ევროპულ სტანდარტებთან, რასაც საშუალოდ 3-4 წელი დასჭირდება.

დეპუტატმა დარგობრივი ეკონომიკისა და ეკონომიკური პოლიტიკის კომიტეტის შემადგენლობა და სტრუქტურა გააცნო სტაჟიორებს. პაატა კვიჟინაძემ სტაჟიორებს კომიტეტის საქმიანობაზე და რამდენიმე მნიშვნელოვან კანონპროექტზეც ესაუბრა, რომელზეც კომიტეტი ბოლო პერიოდის განმავლობაში მუშაობს: ,,ჩვენ აქტიურად ვთანამშრომლობთ როგორც საპარლამენტო კომიტეტებთან, აღმასრულებელ ხელისუფლებასთან და არასამთავრობო ორგანიზაციებთან, ისე რიგით მოქალაქეებთან და ყურადღებით განვიხილავთ მათ განცხადებებს. ბოლო ერთი წლის განმავლობაში კომიტეტმა განიხილა 190 კანონის პროექტი, რომელთაგან 76 შემთხვევაში კომიტეტი იყო წამყვანი, ხოლო 114 შემთხვევაში კომიტეტმა სავალდებულო დასკვნები მოამზადა“.

პაატა კვიჟინაძემ სტაჟიორთა შეკითხვებსაც უპასუხა, რომლებიც ძირითადად საბაზრო ეკონომიკის განვითარების, ლარის კურსის გაუფასურების, სოფლის მეურნეობისა და ტურიზმის განვითარების საკითხებს შეეხებოდა.
შეხვედრის დასასრულს, დეპუტატმა ახალგაზრდებს წარმატებები უსურვა და დაინტერესების შემთხვევაში თანამშრომლობისთვის მზადყოფნა გამოთქვა.

სტაჟირება საქართველოს საკანონმდებლო ორგანოში რამდენიმე წელია მიმდინარეობს, 2015 წელს საქართველოს პარლამენტს 24 სტაჟიორი ჰყავს, რომლებიც 6 თვის განმავლობში პარლამენტის აპარატის სხვადასხვა სტრუქტურულ ერთეულებში გადიან სტაჟირებას და აქტიურად არიან ჩართული როგორც კომიტეტების, ისე დეპარტამენტების ყოველდღიურ საქმიანობაში. სტაჟირების პროცესი პარლამენტის კომიტეტის თავმჯდომარეებთან, მათ მოადგილეებთან თუ პარლამენტის ცალკეულ წევრებთან შეხვედრებსაც ითვალისწინებს, რომელსაც პარლამენტის აპარატის საკადრო საკითხთა დეპატამენტი უზრუნველყოფს.