სპორტისა და ახალგაზრდულ საქმეთა კომიტეტის თავმჯდომარის პირველი მოადგილე, შოთა ხაბარელი სკოლებში ფიზიკური აღზრდისა და სპორტის განვითარების ხელშეწყობის მიზნით რეგიონების წარმომადგენლებს შეხვდა. 

სამუშაო შეხვედრაზე ისაუბრეს იმ მემორანდუმის თაობაზე, რომელიც ფიტნესისა და ფიზიკური განათლების ასოციაციამ ახალგაზრდობის ცენტრთან, სპორტის უნივერსიტეტთან და განათლების სამინისტროსთან გააფორმა. მემორანდუმი ითვალისწინებს განათლების, მეცნიერების, კულტურისა და სპორტის სამინისტროს პროექტის "ახალი სკოლის მოდელი" ფარგლებში სპორტული კომპონენტის შემოტანას, სკოლებში ფიზიკური აღზრდის და სპორტის სწავლებას. შოთა ხაბარელის თქმით, აქამდე სკოლებში ფიზიკური აღზრდა და სპორტული აქტივობები ქაოტურად მიმდინარეობდა. ახალი პროგრამა კი მის სისტემაში მოქცევას და სპორტული ღონისძიებების, ლაშქრობების და სხვა აქტივობების დაგეგმილად ჩატარებას გულისხმობს.

შეხვედრის მონაწილეები კოორდინაციას გაუწევენ ამ პროგრამების რეგიონების საჯარო სკოლებში დანერგვას.