საგარეო ურთიერთობათა კომიტეტის თავმჯდომარე, სოფიო ქაცარავა, უკრაინის უმაღლეს რადაში, კოლეგას, ჰანა ჰოფკოს შეხვდა.

შეხვედრაში ევროინტეგრაციის კომიტეტის წევრები და უკრაინის პარლამენტში საქართველოსთან მეგობრობის ჯგუფის ხელმძღვანელი მონაწილეობდნენ.

მხარეებმა, ორ ქვეყანას შორის ურთიერთობების გამყარებაზე და საკანონმდებლო ორგანოებსა და კომიტეტებს შორის თანამშრომლობის გაძლიერებაზე ისაუბრეს.

შეხვედრაზე საქართველოსა და უკრაინის საგარეო პოლიტიკის პრიორიტეტები მიმოიხილეს. საუბარი შეეხო საერთო გამოწვევებს, რომელიც საქართველოსა და უკრაინის ტერიტორიულ მთლიანობასა და სუვერენიტეტს ეხებოდა.

ყურადღება გამახვილდა აღმოსავლეთ პარტნიორობის თანამშრომლობის ფორმატზე, არსებულ გამოწვევებზე, მიღწეულ შედეგებზე და ნოემბერში დაგეგმილ სამიტზე. მხარეებმა საპარლამენტო ასამბლეების ფარგლებში მხარდაჭერისა და თანამშრომლობის საკითხებიც მიმოიხილეს.

მხარეებმა განხორციელებულ რეფორმებზე და ორი ქვეყნის ევროპულ პერსპექტივაზეც ისაუბრეს.

საგარეო ურთიერთობათა კომიტეტის თავმჯდომარე, სოფიო ქაცარავა უკრაინაში ნატო-ს საპარლამენტო ასამბლეის Rose Roth-ის სემინარის ფარგლებში იმყოფება, სადაც საქართველოს პარლამენტიდან ირაკლი სესიაშვილი, ირაკლი ბერაია, ბექა ოდიშარია, ცოტნე ზურაბიანი და სერგი კაპანაძე მონაწილეობენ.