სპორტისა და ახალგაზრდულ საქმეთა კომიტეტის თავმჯდომარის პირველი მოადგილე, შოთა ხაბარელი პარლამენტის სტაჟიორებსა და პრაქტიკანტებს შეხვდა. შოთა ხაბარელმა დასაწყისში საკუთარი პროფესიული გამოცდილებისა და კარიერის ყველაზე მნიშვნელოვანი მოვლენების შესახებ ისაუბრა და მისი განვლილი სპორტული ცხოვრება გაიხსენა, შემდგომ კი, სპორტისა და ახალგაზრდულ საქმეთა კომიტეტის ფუნქციებსა და ძირითად საქმიანობაზე ისაუბრა.

შოთა ხაბარელმა საქართველოში სპორტში არსებულ სიტუაციაზე საუბრისას აღნიშნა, რომ წლების განმავლობაში სპორტის განვითარების პროგრამის განხორციელება პრობლემა იყო, ბოლო წლებში კი მნიშვნელოვანი ძვრები შეინიშნება, რაც, გარკვეულწილად, აღნიშნული კომიტეტის მაკონტროლებელი ფუნქციის სწორი განხორციელების შედეგი გახლავთ. მისი თქმით, ასევე დადებითი ცვლილებები დაფინანსების თვალსაზრისითაც შეინიშნება, კერძოდ კი სპორტის დაფინანსება 20 მილიონი ლარით გაიზარდა, რამაც აქამდე არსებული ბევრი საკითხისა თუ პრობლემის გადაწყვეტის საშუალება გააჩინა.

კომიტეტის თავმჯდომარის მოადგილე იმ პრობლემებსაც შეეხო, რომლებიც ჯერ კიდევ არსებობს, აღნიშნულის მაგალითებად ფედერაციების მმართველ პოზიციებზე არაკვალიფიციური კადრების არსებობა, ზამთრის სპორტის განვითარების მხრივ არსებული არასახარბიელო მდგომარეობა, ჯანსაღი ცხოვრების წესის პროპაგანდის არასაკმარის დონე და სხვა მაგალითები დაასახელა.
„როცა ქვეყანაში უამრავი სამთო კურორტია, სირცხვილია, ევროპის თამაშებზე მხოლოდ ერთი ლიცენზია რომ გავქვს მოპოვებული, ამის მოსაგვარებლად ბევრი რამ არის გასაკეთბელი, მათ შორის, უნდა შეიქმნას სპორტული სკოლები, სპორტული კლუბები, რათა ხელი შევუწყოთ ზამთრის სპორტის განვითარებას“- განაცხადა შოთა ხაბარელმა. მისივე თქმით, მოცემული პრობლემების აღმოსაფხვრელად წამოყენებული ინიციატივების გამყარება კანონის მეშვეობით უნდა მოხდეს. გარდა ამისა, მისი აზრით, აუცილებელია, სკოლებში პირველივე კლასიდან ბავშვების სხვადასხვა სპორტის სახეობით დაკავება, რაც მნიშვნელოვნად შეუწყობს ხელს ჯანსაღი ცხოვრების წესის გავრცელებას ახალგაზრდებში.

შეხვედრის ნაწილი კითხვა-პასუხის რეჟიმში წარიმართა, სტაჟიორებსა და პრაქტიკანტებს საშუალება ჰქონდათ პასუხები მიეღოთ მათთვის საინტერესო თემებთან დაკავშირებით.

სტუდენტებთან სხვადასხვა კომიტეტის თავმჯდომარეებისა და კომიტეტის სხვა წარმომადგენლების შეხვედრები სისტემურ ხასიათს ატარებს, რაც საკანონმდებლო პროცესებში მათი ჩართულობის ხარისხის ამაღლების და აღნიშნული პროცესების მეტი ღიაობის უზრუნველყოფის მიზნით ხორციელდება. სპორტისა და ახალგაზრდულ საქმეთა კომიტეტის თავმჯდომარის პირველ მოადგილესთან, შოთა ხაბარელთან შეხვედრას პარლამენტის საკადრო საკითხთა დეპარტამენტის უფროსი, დიანა ასათიანი დაესწრო.