ფრაქცია „ქართული ოცნება-კონსერვატორების“ წევრები “ვესტმინსტერის ფონდი დემოკრატიისთვის” (Westminster Foundation for Democracy) წარმომადგენლებს შეხვდნენ
პარლამენტის ვიცესპიკერი ზვიად ძიძიგური, ფრაქცია „ქართული ოცნება- კონსერვატორების“ თავმჯდომარე გიგა ბუკია, საგარეო ურთიერთობათა კომიტეტის თავმჯდომარის პირველი მოადგილე ნინო გოგუაძე და საფინანსო-საბიუჯეტო კომიტეტის პირველი მოადგილე პაატა კვიჟინაძე ვესტმინსტერის ფონდის მმართველი საბჭოს წევრს, გაერთიანებული სამეფოს თემთა პალატის წევრს, ჯეფრი დონალდსონს და მრავალპარტიული ოფისის ხელმძღვანელს, ადელ პოსკიტს შეხვდნენ.
შეხვედრაზე მხარეებმა საქართველოს პარლამენტისა და ფონდის სამომავლო ურთიერთობის ახალი პერსპექტივები და კონსერვატიული პარტიის შიდა პარტიული განვითარების მხარდასაჭერად, ფონდის სამომავლო პროექტები განიხილეს.
„დღეს „ვესტმინსტერის ფონდი დემოკრატიისთვის” წარმომადგენელმა, ბატონმა ჯეფრი დონალდსონმა, დააფიქსირა თავისი პოზიცია, რომ ის, როგორც კონსერვატიული მიმართულების ლობისტი და მხარდამჭერი, მზად არის საქართველოს კონსერვატიული პარტიის ფრაქციასთან პარლამენტში ძალიან აქტიურად ითანამშრომლოს. ვფიქრობ, ეს ფრაქციული საქმიანობის კიდევ მეტად დახვეწას და გააქტიურებას შეუწყობს ხელს“, - განაცხადა შეხვედრის დასრულების შემდეგ ზვიად ძიძიგურმა.
მხარეებმა თანამშრომლობის კუთხით, კონკრეტულ, სამომავლო პროექტებზეც ისაუბრეს.
„ეს ურთიერთობები ერთი წლის წინ დაიწყო და ძალიან საინტერესო გაგრძელება აქვს. პარტიის შიდა სტრუქტურული განვითარება და სტრუქტურებს შორის კომუნიკაცია, პარტიის ამომრჩეველთან კომუნიკაცია და სტრატეგიები სხვადასხვა მნიშვნელოვან საკითხებზე როგორც ქვეყნის შიგნით, ასე ქვეყნის გარეთ. ეს ის თემებია, რაზეც კონსერვატიულმა პარტიამ ვესტმინსტერის ფონდთან შეიძლება ითანამშრომლოს“, - განაცხადა ნინო გოგუაძემ.
შეხვედრაზე სამომავლო თანამშრომლობის საკითხები განიხილეს და შეთანხმდნენ, რომ უახლოეს მომავალში, მხარეები ურთიერთთანამშრომლობის კონკრეტულ სტრატეგიას შეიმუშავებენ - თუ როგორი ტიპის თანამშრომლობა იქნება ვესტმინსტერის ფონდსა და კონსერვატიული პარტიის საპარლამენტო ფრაქციას შორის.
ფონდის წარმომადგენლები ვიზიტის ფარგლებში, საქართველოს კონსერვატიული პარტიის ეროვნული კომიტეტის წევრებს, თბილისის საკრებულოს ფრაქცია „ქართული ოცნება - კონსერვატორების“ წევრებს, საქართველოს კონსერვატიული პარტიის ახალგაზრდული და ქალთა ორგანიზაციის თავმჯდომარეებს შეხვდებიან.
