საქართველოში სამუშაო ვიზიტით ინდონეზიის რესპუბლიკის წარმომადგენლობითი საბჭოს (პარლამენტის) საშინაო საქმეთა კომიტეტის დელეგაცია იმყოფება.

ინდონეზიელ სტუმრებს საკანონმდებლო ორგანოში პარლამენტის თავმჯდომარის მოადგილემ, ზვიად ძიძიგურმა უმასპინძლა. შეხვედრაზე მხარეებმა საპარლამენტო მეგობრობის ჯგუფების შექმნის მნიშვნელობაზე ისაუბრეს და ორ ქვეყანას შორის სამომავლო თანამშრომლობის პერსპექტივები განიხილეს.
 
„ინდონეზიის საპარლამენტო დელეგაციასთან საინტერესო შეხვედრა გაიმართა. საშინაო საქმეთა კომიტეტი ინდონეზიის პარლამენტში ერთ-ერთ მნიშვნელოვან კომიტეტს წარმოადგენს, რადგან 17 ათასზე მეტი კუნძულზე განლაგებულ ქვეყანაში 300-ზე მეტი ეთნიკური ჯგუფი, რამდენიმე რელიგიის და სხვადასხვა ენაზე მოლაპარაკე მაცხოვრებელია. კომიტეტის დელეგაციის ვიზიტის მიზანს საქართველოს პარლამენტის საქმიანობის გაცნობა, ფინანსური მართვის გამოცდილების გაზიარება და შემდგომ ინდონეზიის პარლამენტში მათი გამოყენება წარმოადგენს. შეხვედრაზე ჩვენი ქვეყნების ურთიერთობებში ახალი მიმართულებების გაჩენის პერსპექტივებიც განვიხილეთ. საუბარი შეეხო, მთავრობებს შორის უფრო ინტენსიური კომუნიკაციის დამყარებას და სავაჭრო-ეკონომიკური ურთიერთობების გამყარებას“, - განაცხადა ზვიად ძიძიგურმა შეხვედრის დასრულების შემდეგ.