გურამ მაჭარაშვილის ინიციატივით, ადგილობრივი და ცენტრალური ხელისუფლების წარმომადგენლებს შორის რამდენიმე შეხვედრა გაიმართა
ლაგოდეხისა და ყვარლის მაჟორიტარისა და ფრაქცია „ქართული ოცნება - რეგიონების განვითარებისთვის“ წევრის, გურამ მაჭარაშვილის ინიციატივით, ლაგოდეხის მუნიციპალიტეტის საკრებულოს წევრები საქართველოს პარლამენტს ეწვივნენ. გაიმართა შეხვედრები ვიცე-სპიკერ ზვიად ძიძიგურთან, უმრავლესობის ლიდერ არჩილ თალაკვაძესთან და სხვადასხვა კომიტეტების თავმჯდომარეებთან.
სამუშაო შეხვედრის მთავარი თემა თვითმმართველობის გაძლიერების მიმართულებით არსებული სიახლეები და გამოწვევები იყო და როგორც შეხვედრაზე აღინიშნა, ამ საკითხების გადასაწყვეტად, მომავალში, საკანონმდებლო ცვლილებების მიღება იქნება საჭირო.
,,ჩვენი ქვეყნის სახელმწიფო მოწყობის პირობებში, უდიდესია ძლიერი თვითმმართველობის როლი და მნიშვნელობა, როგორც ადგილობრივი საკითხების გადაწყვეტის, ისე ზოგადად სახელმწიფოს გაძლიერის მიმართულებით“ - აღნიშნა ზვიად ძიძიგურმა.
ლაგოდეხის საკრებულოს წევრებმა, ერთ-ერთ გამოწვევად ადგილობრივი ბიუჯეტის გაზრდა დაასახელეს, რაც, მათი თქმით, თვითმმართველობის ორგანოებს ადგილზე არსებული პრობლემების უფრო სწრაფი და ეფექტიანი გადაჭრის საშუალებას მისცემს.
შეხვედრის მეორე ნაწილში, უმრავლესობის ლიდერმა, არჩილ თალაკვაძემ ცენტრალურ და ადგილობრივ ხელისუფლებებს შორის დიალოგის ფორმატის მნიშვნელობაზე ისაუბრა და ამ დიალოგის მხარდაჭერის მიზნით, მუდმივი კომუნიკაციითვისს მზადყოფნა გამოთქვა.
„ეს ფორმატი ხელს შეუწყობს საკანონმდებლო და ადგილობრივი თვითმმართველობის შტოებს შორის კოორდინაციის გამნტკიცებას, რაც იძლევა გარანტიას, უფრო სწრაფად და ეფექტურად გადაიჭრას ადგილებზე არსებული პრობლემები“ - აღნიშნა არჩილ თალაკვაძემ.
დიალოგის ფორმატში, გურამ მაჭარაშვილის ორგანიზებით, საკრებულოს წევრები ასევე სპორტისა და ახალგაზრდულ საქმეთა კომიტეტის თავმჯდომარეს მიხეილ ყაველაშვილს შეხვდნენ, რომელთანაც ადგილობრივი თვითმმართველობების აქტიური მონაწილეობით, ჯანსაღი ცხოვრების პოპულარიზაციის კომპლექსურ სამოქმედო გეგმაზე ისაუბრეს.
საპროცედურო საკითხთა და წესების კომიტეტის თავმჯდომარესთან, გიორგი კახიანთან შეხვედრისას კი, ხაზი გაესვა საკანონმდებლო რეგულაციების საჭიროებას, რომელიც სკოლამდელი აღზრდის დაწესებულებების სტანდარტიზაციის პროცესს დააჩქარებს. ამავე თემაზე, სამომავლოდ, კიდევ ერთი სამუშაო შეხვედრაც დაიგეგმა.
გურამ მაჭარაშვილის შეფასებით, დიალოგის განმტკიცების ეს ფორმატი, რაც ჯამში, კიდევ უფრო ძლიერი თვითმმართველობის ჩამოყალიბებას უწყობს ხელს, სამომავლოდაც გაგრძელდება.
