საქართველოს პარლამენტის აპარატსა და თურქეთის დიდი ეროვნული ასამბლეის ადმინისტრაციას შორის ურთიერთთანამშრომლობის მემორანდუმი გაფორმდა
საქართველოს პარლამენტის აპარატსა და თურქეთის დიდი ეროვნული ასამბლეის ადმინისტრაციას შორის თანამშრომლობის ახალი ეტაპი დაიწყო, რასაც ადმინისტრაციების ხელმძღვანელების მიერ ანკარაში გაფორმებული ურთიერთთანამშრომლობის მემორანდუმი დაედო საფუძვლად.
მემორანდუმის გაფორმებას წინ უძღვოდა ორმხრივი მოლაპარაკებები მომავალი თანამშრომლობის პერსპექტივების თაობაზე. ორივე პარლამენტის ადმინისტრაციის ხელმძღვანელმა ხაზი გაუსვა საქართველოსა და თურქეთის პარლამენტებს შორის არსებული მეგობრული და პარტნიორული ურთიერთობის მნიშვნელობას.
მხარეებმა აღნიშნეს, რომ ადმინისტრაციებს შორის გაფორმებული მემორანდუმი კიდევ უფრო დააახლოებს ორი ქვეყნის საკანონმდებლო ორგანოს და ხელს შეუწყობს პარლამენტის ადმინისტრაციის თანამშრომლების გაცვლითი პროგრამების განხორციელებასა და მიღწევებისა და გამოცდილების გაზიარებას.
საქართველოს პარლამენტის აპარატის უფროსმა, გივი მიქანაძემ განსაკუთრებული ყურადღება გაამახვილა თურქ კოლეგასთან წარმატებულ თანამშრომლობაზე სხვადასხვა საერთაშორისო მრავალმხრივი ფორმატის ფარგლებში. მანვე აღნიშნა, რომ ურთიერთგაგების მემორანდუმი ხელს შეუწყობს კოლეგების გაცნობასა და სხვადასხვა საკითხებზე გამოცდილების გაზიარებას.
გივი მიქანაძემ თურქეთის დიდი ეროვნული ასამბლეის ადმინისტრაციის უფროსს, მეჰმეტ ალი კომბუზოღლუს შესთავაზა მიმდინარე წლის ზაფხულში ნატოს საპარლამენტო ასამბლეის ეგიდით შავი ზღვის აუზის ნატოს წევრი და ასპირანტი ქვეყნების პარლამენტის ადმინისტრაციის თანამშრომლებისთვის საქართველოში დაგეგმილი პირველი აკადემიის ერთობლივად გახსნა.
აპარატის უფროსმა ივნისში საქართველოს პარლამენტში მოიწვია თურქეთის დიდი ეროვნული ასამბლეის ადმინისტრაციის 5 თანამშრომელი განხორციელებული და მიმდინარე რეფორმების გასაცნობად. თურქმა კოლეგამ დაადასტურა ადმინისტრაციის თანამშრომელთა ნომინირება აღნიშნული ვიზიტისთვის და თავის მხრივ განაცხადა მზაობა უმასპინძლოს საქართველოს პარლამენტის აპარატის დელეგაციას.
შეხვედრას საქართველოს მხრიდან ესწრებოდნენ საგანგებო და სრულუფლებიანი ელჩი თურქეთის რესპუბლიკაში, გიორგი ჯანჯღავა, საელჩოსა და პარლამენტის აპარატის წარმომადგენლები.
