პარლამენტის აპარატის თანამშრომლებისთვის, საჯარო სამსახურის ბიუროს წარმომადგენლებმა, ლექცია გამართეს, რომელიც საჯარო სამსახურში ეთიკის ნორმების დანერგვასა და ინტერესთა შეუთავსებლობის საკითხებს შეეხებოდა.

საჯარო სამსახურის ბიუროს უფროსის მოადგილის მოვალეობის შემსრულებელმა - ირინა აღაპიშვილმა და ადამიანური რესურსების მართვის დეპარტამენტის უფროსმა - გვანცა ბესელიამ, აპარატის თანამშრომლებს, საჯარო დაწესებულებებში ქცევის ნორმების - ეთიკის დანერგვის მნიშვნელობაზე ინფორმაცია მიაწოდეს და აღნიშნული ნორმატიული აქტის მომზადების პროცესზე ისაუბრეს. 

ირინა აღაპიშვილის ინფორმაციით, ეთიკის კოდექსზე მუშაობისას არაერთი შეხვედრა და დისკუსია გაიმართა, რომელზეც საჯარო დაწესებულებებში მომხდარი კონკრეტული შემთხვევების განხილვა მიმდინარეობდა. მისივე განცხადებით, სამართლებრივ აქტზე მუშაობისას, შესწავლილი იქნა ქართული რეალობა და შესაბამისად, ეთიკის კოდექსი არც ერთი სხვა ქვეყნის ანალოგს არ იმეორებს. საჯარო სამსახურის ბიუროს წარმომადგენელმა ეთიკის კოდექსის პარალელურად შინაგანაწესის მნიშვნელობაზეც ისაუბრა და აღნიშნა, რომ მასში თავმოყრილია ისეთი ნორმები როგორიცაა ჩაცმის წესი, შრომითი დისციპლინა და სხვა, რაც თითოეული უწყებისთვის ინდივიდუალურ მიდგომებს წარმოადგენს.

საჯარო ლექციაზე მომხსენებელმა კომუნიკაციის სტანდარტებზე და პერსონალის მართვის პროცესში მენეჯერის პასუხისმგებლობის მნიშვნელობაზე ისაუბრა. მისი განცხადებით, ეთიკის კოდექსი მენეჯერს უფრო მეტ ყურადღებას და პასუხისმგებლობას აკისრებს, ვიდრე მის თანამშრომლებს, რადგან უშუალოდ მენეჯერის ვალდებულებაა, რომ თანამშრომლებს შორის სწორი კომუნიკაცია აწარმოოს და არ მოხდეს შიდა კონფრონტაციები. საჯარო სამსახურის ბიუროს წარმომადგენლებმა მოხელის პასუხისმგებლობის ვალდებულებაზეც ისაუბრეს. აღინიშნა, რომ მოხელეობა დიდი პასუხისმგებლობაა და იგი ყოველთვის აღემატება იმ ბენეფიტებსა და პრივილეგიებს, ვიდრე უშუალოდ მოხელის სტატუსია. პრეზენტატორებმა ლექციაზე „მისკომუნიკაციის“ და დიალოგის დეფიციტის შედეგად წარმოშობილ პრობლემებზე, ფავორიტიზმსა და ნეპოტიზმის მიდგომებზე ისაუბრეს და აღნიშნეს, რომ ყოველივე ესენი შესრულებულ სამუშაოს ხარისხზე უარყოფითად აისახება და ორგანიზაციული კულტურის ჩამოყალიბებას უშლის ხელს. 

ეთიკის კოდექსის ნორმებზე გამართული შეხვედრა დისკუსიის რეჟიმში გაგრძელდა. პარლამენტის აპარატის თანამშრომლებმა მოსმენილ ინფორმაციაზე მოსაზრებები და საკუთარი შეხედულებები გამოთქვეს.