გარემოს დაცვისა და ბუნებრივი რესურსების კომიტეტმა მეორე მოსმენისთვის განიხილა საქართველოს პარალამენტის წევრების: ნინო წილოსანისა, სულხან მახათაძის, კახაბერ კუჭავას, დავით სონღულაშვილის და რომან მუჩიაშვილის მიერ საკანონმდებლო ინიციატივის წესით წარმოდგენილი კანონპროექტი „დაცული ტერიტორიების სტატუსის შესახებ“ საქართველოს კანონში ცვლილების შეტანის თაობაზე“.

მომხსენებლის, სულხან მახათაძის განმარტებით, კანონპროექტის მიხედვით საგარეჯოს მუნიციპალიტეტის ტერიტორიაზე იქმნება მარიამჯვრის დაცული ტერიტორიები, რომელიც მოიცავს უკვე არსებულ მარიამჯვრის ნაკრძალს და ასევე, ახლადშექმნილ ცივ-გომბორის აღკვეთილს. მისივე თქმით, მარიამჯვრის დაცული ტერიტორიების ფართობი იქნება 5958.3 ჰა. კანონის ძალაში შესვლის თარიღად განსაზღვრულია 2021 წლის პირველი იანვარი. კომიტეტმა მხარი დაუჭირა კანონპროექტის პლენარულ სხდომაზე განხილვას.

გარემოს დაცვისა და ბუნებრივი რესურსების კომიტეტმა, ასევე მეორე მოსმენისთვის განიხილა საქართველოს მთავრობის მიერ საკანონმდებლო ინიციატივის წესით წარმოდგენილი კანონპროექტი „გარემოსდაცვითი პასუხისმგებლობის შესახებ“ თანმდევ კანონპროექტებთან ერთად.

„გარემოსდაცვითი პასუხისმგებლობის შესახებ“ კანონის მიზანია გარემოზე ზიანის მიყენების საკითხების სამართლებრივი რეგულირება „დამბინძურებელი იხდის“ პრინციპის შესაბამისად.

მომხსენებლის, გარემოს დაცვისა და სოფლის მეურნეობის მინისტრის მოადგილის, ნინო თანდილაშვილის განცხადებით, ინიციატორებისთვის ძალიან მნიშვნელოვანია კომიტეტის მხარდაჭერა.

„საკანონმდებლო ინიციატივის განხილვის პროცესში ჩვენ გვქონდა შესაძლებლობა დეტალურად განგვეხილა თითოეული საკითხი, რომელსაც კანონი არეგულირებს. ეს არის აბსოლუტურად ახალი სტანდარტი გარემოსდაცვით სფეროში და ეს იქნება კანონი, რომელიც სრულიად ახლებურად დაარეგულირებს გარემოსდაცვითი პასუხისმგებლობის საკითხებს, სწორედ ისე, როგორც ამას ევროკავშირის საუკეთესო გამოცდილება ითვალისწინებს. კანონპროექტი გაზრდის კერძო სექტორის მხრიდან პასუხისმგებლიან დამოკიდებულებას და სახელმწიფოს აღსრულების სისტემას გახდის იმაზე უფრო ეფექტიანს, ვიდრე ეს დღეს არის“, - აღნიშნა ნინო თანდილაშვილმა.

მომხსენებელმა კომიტეტის წევრებს კანონპროექტში ტერმინოლოგიური თვალსაზრისით და ასევე, მის პროცედურულ ნაწილში შეტანილი ცვლილებები გააცნო.

კომიტეტის წევრებმა მხარი დაუჭირეს საკანონმდებლო პაკეტის პლენარულ სხდომაზე განხილვას.