ბრიუსელში ევრონესტის საპარლამენტო ასამბლეის ეკონომიკური ინტეგრაციის, სოციალურ საკითხთა, განათლების, კულტურისა და სამოქალაქო საზოგადოების კომიტეტების სხდომა გაიმართა
ევროპარლამენტში ევრონესტის საპარლამენტო ასამბლეის ეკონომიკური ინტეგრაციისა და ევროკავშირთან საკანონმდებლო და პოლიტიკური დაახლოების და სოციალურ საკითხთა, განათლების, კულტურისა და სამოქალაქო საზოგადოების კომიტეტების გაერთიანებული სხდომა გაიმართა.
კომიტეტების მუშაობაში საქართველოს პარლამენტის მუდმივმოქმედი დელეგაციის წევრები ირინა ფრუიძე, დიმიტრი ცქიტიშვილი, ბექა ნაცვლიშვილი, გიორგი მოსიძე, გუგული მაღრაძე, სერგი კაპანაძე და სალომე სამადაშვილი მონაწილეობენ.
ეკონომიკური ინტეგრაციისა და ევროკავშირთან საკანონმდებლო და პოლიტიკური დაახლოების კომიტეტმა განიხილა რეზოლუციის პროექტი - „ევროკავშირსა და აღმოსავლეთ ევროპის პარტნიორობის ქვეყნებში ციფრული ტექნოლოგიების განვითარება ეფექტიანობის გაუმჯობესებისა და ეკონომიკური ზრდის სტიმულირების მიზნით“.
მომხსენებლებმა ევროკავშირსა და აღმოსავლეთ პარტნიორობის ქვეყნებს შორის ციფრული ეკონომიკის სფეროში თანამშრომლობის გაძლიერების განსაკუთრებულ მნიშვნელობაზე ისაუბრეს. როგორც აღინიშნა, ციფრული ტექნოლოგიების განვითარება უზრუნველყოფს ახალ შესაძლებლობებს ბიზნესისა და მოქალაქეებისთვის, ასევე დაეხმარება ქვეყნებს შექმნან ახალი სამუშაო ადგილები, გაზარდონ ბიზნესის ეფექტურობა და მოიზიდონ ინვესტიციები, რაც მნიშვნელოვანია ქვეყნის სტაბილური განვითარებისთვის.
სოციალურ საკითხთა, განათლების, კულტურისა და სამოქალაქო საზოგადოების კომიტეტის სხდომაზე, იმსჯელეს ევროკავშირსა და აღმოსავლეთ პარტნიორ ქვეყნებში განათლების რეფორმებზე, გამოწვევებსა და შესაძლებლობებზე ასევე, განათლების სექტორში ინოვაციების განვითარებაზე.
კომიტეტის სხდომაზე აღინიშნა მნიშვნელოვანი პროექტები განათლებისა და ინოვაციების სფეროში, როგორიცაა მაგალითად 2018 წელს თბილისში გახსნილი აღმოსავლეთ პარტნიორობის ევროპული სკოლა.
სხდომაზე მორიგ საკითხად ტუბერკულოზის გავრცელების პრევენციასა და აღმოფხვრის გზებზე იმსჯელეს. როგორც აღინიშნა, ტუბერკულოზი დღემდე რჩება საზოგადოებრივი ჯანდაცვის ერთ-ერთ ყველაზე დიდ გამოწვევად ამიტომ მის წინააღმდეგ ბრძოლა უნდა გაძლიერდეს.
სხდომის ფარგლებში, განხილულ სამუშაო დოკუმენტებზე მუშაობა კვლავ გაგრძელდება და მას საბოლოოდ, საპარლამენტო ასამბლეის მერვე პლენარული სესია დაამტკიცებს, რომელიც 2019 წლის შემოდგომაზე საქართველოში ჩატარდება.
