დიასპორისა და კავკასიის საკითხთა კომიტეტის თავმჯდომარის პირველ მოადგილედ გივი ჭიჭინაძე აირჩიეს
დიასპორისა და კავკასიის საკითხთა კომიტეტის თავმჯდომარის პირველ მოადგილედ გივი ჭიჭინაძის არჩევას, კომიტეტის წევრებმა მხარი ერთხმად დაუჭირეს.
ახლადარჩეულმა კანდიდატმა კომიტეტში სალომე ზურაბიშვილი შეცვალა, რომელსაც პარლამენტის წევრის უფლებამოსილება ვადაზე ადრე, საქართველოს პრეზიდენტად არჩევის გამო შეუწყდა.
„სალომე ზურაბიშვილი არჩეულია საქართველოს პრეზიდენტად. პარლამენტის დადგენილებით, მას საქართველოს პარლამენტის წევრის უფლებამოსილება ვადაზე ადრე შეუწყდა. შესაბამისად, მან დატოვა დიასპორისა და კავკასიის საკითხთა კომიტეტის თავმჯდომარის პირველი მოადგილის თანამდებობა. ვსარგებლობ კომიტეტის თავმჯდომარის უფლებით, წარმოგიდგინოთ პირველი მოადგილის პოსტზე გივი ჭიჭინაძის კანდიდატურა. ამასთან, ვითვალისწინებ ფრაქციების რეკომენდაციებს აღნიშნულ კანდიდატთან დაკავშირებით“, - განაცხადა ზვიად კვაჭანტირაძემ.
დიასპორისა და კავკასიის საკითხთა კომიტეტი სსიპ „საზოგადოებრივ მაუწყებელს“ რეკომენდაციით მიმართავს, რათა გადაცემათა ციკლში რადიოგადაცემა - „ემიგრაციის ხმა“ ჩართონ.
როგორც ზვიად კვაჭანტირაძემ აღნიშნა, დიასპორისა და კავკასიის საკითხთა კომიტეტში შემოსულია კომიტეტთან არსებული სამეცნიერო-საკონსულტაციო საბჭოს წევრის წერილი, სადაც წარმოდგენილია სსიპ „საზოგადოებრივი მაუწყებლის“ ჟურნალისტთა ჯგუფის მიერ მომზადებული რადიოგადაცემის - „ემიგრაციის ხმა“ - პროექტი.
„აღნიშნული პროექტიდან ნათლად ჩანს გადაცემის აქტუალურობა თანამედროვე რეალობაში, პროექტის მიზნები და რადიოგადაცემების თემატიკა. მიგვაჩნია, რომ ეს არის ქართულ ემიგრაციასთან ურთიერთობის ერთ-ერთი საუკეთესო ფორმატი. გადაცემა ხელს შეუწყობს ქართულ დიასპორასთან კავშირების გაღრმავებას, პრობლემების გამოკვეთას და მათი გადაჭრის გზების გამონახვას. გარდა ამისა, რადიოგადაცემის მეშვეობით მოხდება სახელმწიფოს დიასპორული და მიგრაციული პოლიტიკის პოპულარიზაცია. ჟურნალისტების აღნიშნულ ჯგუფთან და მსგავსი სახის რადიო გადაცემასთან კომიტეტს ნაყოფიერი თანამშრომლობის გამოცდილება აქვს წინა წლებში და დავრწმუნდით მის მნიშვნელობაში ქართული სახელმწიფოსა და ქართული დიასპორისათვის“, - განაცხადა ზვიად კვაჭანტირაძემ.
