დიასპორისა და კავკასიის საკითხთა კომიტეტის სხდომა
დიასპორისა და კავკასიის საკითხთა კომიტეტის სხდომაზე, რომელსაც კომიტეტის თავმჯდომარე ბექა ოდიშარია უძღვებოდა, დიასპორასთან ურთიერთობის შემდგომი განვითარების მიზნით, საგარეო საქმეთა სამინისტროს მიერ გამოცხადებული საგრანტო პროგრამებისა და არსებული ვითარების გათვალისწინებით, სამინისტროს დიასპორასთან ურთიერთობის დეპარტამენტის მიმდინარე წლის გეგმის თაობაზე ინფორმაციები მოისმინეს.
კომიტეტის თავმჯდომარემ სხდომის დასაწყისში აღნიშნა, რომ გარდა პარლამენტის საკომიტეტო მუშაობისა, საგარეო საქმეთა სამინისტროს დიასპორასთან ურთიერთობის დეპარტამენტი დიასპორებთან ურთიერთობებისთვის მნიშვნელოვანი ინსტიტუტია.
მომხსენებელმა, საგარეო საქმეთა სამინისტროს დიასპორასთან ურთიერთობის დეპარტამენტის დირექტორმა, მუხრან გულაღაშვილმა კომიტეტს აქტიური თანამშრომლობისთვის მადლობა გადაუხადა და კომიტეტის წევრებს ის საგრანტო პროგრამები გააცნო, რომელთა განხორციელებაზეც საგარეო საქმეთა სამინისტროს დიასპორასთან ურთიერთობის დეპარტამენტი მუშაობს.
მუხრან გულაღაშვილმა დიასპორული ინიციატივების პროგრამის მნიშნელობაზე გაამახვილა ყურადღება. მისი განმარტებით, წელს პროგრამას დაემატა ახალი კომპონენტი, რაც საგანმანათლებლო და კულტურული მიმართულებების გარდა ევროკავშირის წევრობისთვის მზადების პროცესში სახალხო დიპლომატიის ჩართულობას და მხარდაჭერას ითვალისწინებს. მანვე განმარტა, რომ პროგრამაში ეს ნაწილი დეტალურადაა გაწერილი და ევროინტეგრაციის მიმართულებით რიგი პროექტების დაფინანსება და განხორციელებაა დაგეგმილი.
„გარდა აღნიშნულისა, წელს ჩვენ, დიასპორასთან მუდმივი ინტერაქციის და მათთან კონსულტაციების საფუძველზე, გავაკეთეთ საზღვარგარეთ მოქმედი ფოლკლორული ანსამბლების საპილოტე პროგრამა, რომლითაც მხარს დავუჭერთ მათ და დავეხმარებით განვითარებაში“, - განაცხადა მუხრან გულაღაშვილმა.
მომხსენებლის განცხადებით, ასევე დასრულებულია ლევილის რეკონსტრუქცია-რეაბილიტაციის პროექტის ერთი კომპონენტი და მიმდინარეობს სამუშაოები ძირითადი პროექტის სრულად განსახორციელებლად, რომლის დასრულებაც, სავარაუდოდ, 2024 წლისთვის არის გათვალისწინებული.
მომხსენებელმა შეკითხვებს უპასუხა და წარმოდგენილ პროექტებთან დაკავშირებით კომიტეტის წევრებს დეტალური განმარტებები მიაწოდა.
კომიტეტის თავმჯდომარემ, ბექა ოდიშარიამ აღნიშნა, რომ მნიშნელოვანია საპარლამენტო კომიტეტის ჩართულობა სამინისტროს მიერ გამოცხადებულ დიასპორულ პროექტებში, რაც ემიგრაციასთან ურთიერთობის და კომუნიკაციის საუკეთესო საშუალებას წარმოადგენს.
კომიტეტმა წარმოდგენილი ანგარიში ცნობად მიიღო.
