პარლამენტის წევრმა ეკა ბესელიამ უმაღლესი საკანონმდებლო ორგანოს მის მიერ ინიცირებული კანონპროექტების განხილვის თხოვნით მიმართა.

დღეს გამართულ ბრიფინგზე ეკა ბესელიამ რამდენიმე კანონპროექტზე გაამახვილა ყურადღება და აღნიშნა, რომ მათი განხილვა მე-9 მოწვევის პარლამენტისთვის შეუსრულებელ ვალდებულებად არ უნდა დარჩეს.

 „მინდა მივმართო პარლამენტს, კანონპროექტების განხილვა ცოტა უფრო სწრაფ ტემპებში  და უფრო მოკლე ვადაში მოახდინოს.  პირველ რიგში ეს ეხება ახალ კანონპროექტს ამნისტიის შესახებ, რომელსაც დღეს პარლამენტის ბიუროს წარვუდგენ. პატიმრობაში მყოფი არაერთი პირი ელოდება გარკვეულ საკანონმდებლო ცვლილებებს, მაგრამ ეს პარლამენტი როგორც ჩანს არ არის მზად იმისათვის, რომ ნარკოპოლიტიკის რეფორმა მიიყვანოს ბოლომდე. ჩავთვალოთ, რომ ამ მოწვევის პარლამენტისთვის ეს დარჩება როგორც შეუსრულებელი ვალდებულება და შეუსრულებელი პირობა და ვაკუუმი, რაც დღეს გაჩნდა საკონსტიტუციო სასამართლოს გადაწყვეტილების შემდეგ, რომელმაც გააუქმა რამდენიმე ნორმა, რომელთა საფუძველზეც ადამიანები სასჯელს იხდიან.  დღეს არის რეალური ვაკუუმი, არის საკანონმდებლო პრობლემა, რაც ვერ გასწორდება ვერანაირად - ან კანონი უნდა შეიცვალოს, რაც ვერ მოესწრება და ვერ მოხერხდება, ან ეს არის მოკლე გზა, რომელსაც ვთავაზობ პარლამენტს - ამნისტიის პროექტი“, - განაცხადა ეკა ბესელიამ.

დეპუტატის თქმით, ამ კანონპროექტის მიღება  ყველასათვის მნიშვნელოვანია.

„ვინც არ უნდა თქვას, რომ ეს არის წინასაარჩევნო პერიოდისთვის მიღებული, რაც უნდა ის დაარქვან, როგორც უნდა ისე მონათლონ, ჩემთვის ახლა მთავარი და მნიშვნელოვანია, რომ პირობა და ვალდებულება, რომელიც ჩვენ ავიღეთ თავის დროზე, მათ შორის მეც იმ გუნდთან ერთად, რომელმაც უთხრა საზოგადოებას, რომ შესთავაზებდა მათ ამ პრობლემის გადაჭრის გზებს, შევასრულოთ. ეს მნიშვნელოვანია იმ  ადამიანებისათვის, რომლებიც უსამართლოდ იხდიან სასჯელს წლების განმავლობაში, მათ შორის არის ისეთი რამდენიმე პატიმარი, რომლებმაც წინა ხელისუფლებიდან მოყოლებული ამ დრომდე დარჩა საპატიმროში სხვადასხვა დანაშაულის ერთობლიობის სასჯელით, მაგრამ უსამართლო სასჯელით და მათ შორის ისინიც, ვინც მცირე ოდენობის ნარკოტიკითაც სასჯელს იხდის და ეს სასჯელი არის მაღალი. ამიტომ პარლამენტს მინდა ვთხოვო,  იურიდიულ საკითხთა კომიტეტმა მოკლე ვადაში განიხილოს, რადგან ამ კანონს ელოდება არაერთი პატიმარი, მათი ოჯახები“, - განაცხადა ეკა ბესელიამ.

პარლამენტის წევრმა მის მიერ უკვე ინიცირებული კანონპროექტებიც გაიხსენა, რომელთა განხილვაც კომიტეტებშია  შეჩერებული, მათ შორის, ინიციატივა ბავშვთა უსაფრთხოების საკითხებთან დაკავშირებით. ეკა ბესელიას განცხადებით,  საკითხი რამდენჯერმე გადავადდა  და ბოლო გადავადება მოხდა ივნისში, როდესაც სამი თვით გადაავადეს.

„ეს იმას ნიშნავს, რომ ეს მოწვევის პარლამენტი არ აპირებს ინიციატივის განხილვას. მე არაერთი განცხადება გავაკეთე და არა ერთი წერილით მივმართე, რომ განიხილონ ეს კანონპროექტი იმიტომ, რომ მისი ინიციატორი და ავტორი გახლავს არაერთი არასამთავრობო ორგანიზაცია, რომელიც ბავშვთა უფლებებზე მუშაობდა და მუშაობს. მათთან ერთად შემუშავდა ეს ინიციატივა. იგი ეხება ძალიან მაღალ მაჩვენებელს ავტოავარიების დროს, სადაც ბავშვები არიან დაშავებულები და ხშირ შემთხვევაში ტრაგიკულად დასრულებულა ასეთი შემთხვევები. ეს იდეა არის ბავშვთა უფლებების დაცვის კუთხით საჭირო ინიციატივა, რომლის განხილვა ერთმა კომიტეტმა დაასრულა და ახლა გაჩერებულია იურიდიულ საკითხთა და ადამიანის უფლებათა კომიტეტების დონეზე“, - განაცხადა ეკა ბესელიამ.

ეკა ბესელიას თქმით, ასევე გადადებულია სასამართლო სისტემის რეფორმასთან დაკავშირებული ინიციატივაც, რომლის განხილვა საერთოდ არ დაწყებულა.

„მივმართავ პარლამენტს, რომ ვიდრე დაამთავრებს საპარლამენტო მუშაობას, დაუბრუნდეს ამ მნიშვნელოვან კანონპროექტს. ეს ეხება სასამართლო რეფორმის მეოთხე ეტაპის საკითხს, მოსამართლეთა არჩევის ახალ პროცედურას, იმ ახალ კანონპროექტს, რომლის მიღება არის ამ მოწვევის პარლამენტისთვის პრინციპული. პრინციპული იმიტომ, რომ ცუდი ცვლილებების გამო საქართველოს ხელისუფლებამ მიიღო არაერთი კრიტიკა საერთაშორისო ორგანიზაციების მხრიდან, მათ შორის ევროპარლამენტის ბოლო რეზოლუციის ტექსტშიც პირდაპირ იყო მოწოდება, რომ შეცვალეთ კანონი, რომელიც ეხება მოსამართლეების არჩევის წესს და გაითვალისწინეთ ვენეციის კომისიის და სხვა ორგანიზაციების რეკომენდაციები“, - განაცხადა ეკა ბესელიამ.

მისი თქმით, ეს არის საკითხები, რომელთა მიმართ საზოგადოების ინტერესი ძალიან მაღალია და მნიშვნელოვანია, რომ პარლამენტმა ეს კანონპროექტები  განიხილოს.